თბილისში მუსიკალური ფესტივალი - “ხელოვნება განათლებისთვის“ მიმდინარეობს, რომლის ორგანიზატორები სსიპ განათლების საერთაშორისო ცენტრის სტიპენდიატები - მარიამ მაჩაიძე (ვიოლინო - ჯულიარდის სკოლა, აშშ) და ქეთევან ტიღაშვილი (ჰობოი - მიუნხენის მუსიკისა და საშემსრულებლო ხელოვნების უნივერსიტეტი, გერმანია) არიან.
ფესტივალში მონაწილეობას აგრეთვე მიიღებენ ესტონეთის, იტალიის, ინგლისის, უკრაინისა და კორეის რესპუბლიკის წარმომადგენლები - სუან ო - ვიოლინო, ლილია ტიმჩიშენი - ალტი, იოჰანეს ველია - ჩელო, მატეო გობინი - ფორტეპიანო. პროექტი შედგება მასტერკლასებისა და კონცერტებისგან ნიჭიერთა ათწლედის მოსწავლეებისთვის, კონსერვატორიის სტუდენტებისა და ფართო საზოგადოებისთვის. პროექტის მიზანია, საქართველოში ინსტრუმენტალური მუსიკის განვითარება, მომავალი თაობის, ახალგაზრდების მოზიდვა და კლასიკური მუსიკით დაინტერესება. ფესტივალის ფარგლებში გაიმართება შემდეგი ღონისძიებები:

9, 10, 11 მარტი, 13:00 საათი - მასტერკლასები თბილისის სახელმწიფო კონსერვატორიაში;

13 მარტი, 20:00 საათი- კონცერტი ( საქართველოს პარლამენტის ეროვნული ბიბლიოთეკა, გუდიაშვილის ქუჩა 7);

14 მარტი, 19:00 საათი - კონცერტი ( “კამარა” ოქროყანის ქუჩა 17);

15 მარტი 20:30 საათი - კონცერტი ( „ფაბრიკა“, ნინოშვილის 8;

16 მარტი 18:00 საათი – კონცერტი (თბილისის სახელმწიფო კონსერვატორიის მცირე დარბაზი, გრიბოედოვის ქუჩა 8/10);

აღნიშნული პროექტი სსიპ განათლების საერთაშორის ცენტრის მიერ გამოცხადებული „კურსდამთავრებულთა მცირე საგრანტო კონკურსის“ გამარჯვებული პროექტია ( სულ 4 პროექტი დააფინანსა ცენტრმა). „კურსდამთავრებულთა მცირე საგრანტო კონკურსის“ მიზანია, ცენტრის სასტიპენდიო პროგრამების კურსდამთავრებულთა ინტელექტუალური რესურსის გამოყენება ქვეყნის სახელმწიფოებრივი, საზოგადოებრივი, საგანმანათლებლო, სამეცნიერო, კულტურული, ეკონომიკური და სოციალური განვითარების საქმეში.
განათლების საერთაშორისო ცენტრი დაარსდა 2014 წელს და 2014-17 წლებში 500 - ზე მეტი სასწავლო სტიპენდია გასცა საზღვარგარეთ სწავლის მსურველ საქართველოს მოქალაქეებისთვის. მათმა ნაწილმა უკვე დაასრულა საზღვარგარეთ სწავლა, დაბრუნდა ქვეყანაში და მიღებული ცოდნის რეალიზებას საკუთარ ქვეყანაში განაგრძობს. ცენტრის მიზანია სახელმწიფოს განვითარების პრიორიტეტების გათვალისწინებით, საერთაშორისო სტანდარტების შესაბამისი უნარებისა და ცოდნის მქონე კადრების მომზადება. აღნიშნულიდან გამომდინარე, ცენტრი იძლევა შესაძლებლობას საქართველოს მოქალაქეებმა საზღვარგარეთ მიიღონ საუკეთესო განათლება და სასწავლო პროგრამის დასრულების შემდგომ მიღებული ცოდნის რეალიზება საკუთარ ქვეყანაში განაგრძონ.