კორეის რესპუბლიკის ეროვნულ ასამბლეაში საქართველოს ღირსშესანიშნაობების, კულტურისა და ისტორიის შესახებ გამოფენა, სადაც საქართველოს სხვადასხვა ქალაქების ამსახველი ფოტოები, სამი სახეობის ქართული ანბანი და შუა საუკუნეების ქართული სამოსი იყო წარმოდეგენილი პირველად მოეწყო.
საქართველოს საგარეო სამინისტროს პრესსამსახურის ინფორმაციით, გამოფენის გახსნაზე დამსწრე საზოგადოებას სიტყვით კორეის რესპუბლიკაში საქართველოს საგანგებო და სრულუფლებიანმა ელჩმა ოთარ ბერძენიშვილმა და კორეა-საქართველოს საპარლამენტთაშორისო მეგობრობის ჯგუფის თავმჯდომარემ, იუ სინგ-ჰიმ მიმართეს.
მათ ქართული და კორეული მდიდარი კულტურისა და ისტორიის შესახებ ისაუბრეს. გამომსვლელებმა მიმდინარე წელს საქართველოსა და კორეის რესპუბლიკას შორის დიპლომატიური ურთიერთობების დამყარების 25 წლის საიუბილეო თარიღთან დაკავშირებით კმაყოფილება გამოთქვეს და ამ ხნის განმალობაში ჩამოყალიბებულ წარმატებულ ურთიერთობებს ხაზი გაუსვეს .
უწყების ცნობით, ღონისძიება საქართველოს საელჩოსა და კორეა-საქართველოს საპარლამენტთაშორისო მეგობრობის ჯგუფის თანა-ორგანიზებით მოეწყო. გამოფენის გახსნის ცერემონიას კორეის ეროვნული ასამბლეის ვიცე-სპიკერი, კორეა-საქართველოს საპარლამენტთაშორისო მეგობრობის ჯგუფის წევრები, მმართველი და ოპოზიციური საპარლამენტო პოლიტიკური პარტიების წევრი დეპუტატები,საზოგადოების წარმომადგენლები და კორეაში მცხოვრები ქართველები დაესწრნენ . მოწვეულ სტუმრებს ქართული ღვინისა და მინერალური წყლების დაგემოვნების საშუალება მიეცათ.