„რესპუბლიკური პარტიის“ ერთ-ერთი ლიდერი, პარლამენტში კოალიცია „ქართული ოცნების“ ქვოტით გასული დეპუტატი ლევან ბერძენიშვილი, რეჟისორ გოგა ხაინდრავას მიერ გადაღებულ ფილმს აფასებს და აცხადებს, რომ ფილმს ხელოვნებასთან არანაირი კავშირი არ აქვს და ის დაკვეთილი პროპაგანდაა.

ინტერვიუ ფილმთან დაკავშირებით, ბერძენიშვილმა ფრანგულ რადიო «RFI – Radio France Internationale»-ს მისცა.

საინფორმაციო სააგენტო „ნიუსპრესი“ გთავაზობთ ფრაგმენტს ინტერვიუდან:

ლევან ბერძენიშვილი: მე მთელი ჩემი ცხოვრება ლიტერატურითა და ხელოვნებით ვარ დაკავებული, ამიტომ შემიძლია გითხრათ, რომ ამ ფილმს ხელოვნებასთან არანაირი კავშირი არ აქვს, ის პროპაგანდისტულია. რეჟისორის მიზანია იმის წარმოჩენა, რომ ქვეყანაში თითქოსდა მხოლოდ ორი პარტიაა: კარგი „ქართული ოცნება“ და ცუდი „ერთიანი ნაცმოძრაობა“ (მიხეილ სააკაშვილის პარტია), ყველა დანარჩენი კი - ან კარგია, ან ცუდი. მოქმედებს პრინციპი: „ვინც ჩვენს გვერდით არ დგას, ის ჩვენი მტერია“. მე ვნახე ფილმის ტრეილერი და დავრწმუნდი - „ჰეროკრატია“ პროპაგანდაა და მეტი არაფერი! ეს ხელოვნებაა კი არა არის, ეს პოლიტიკაა. ესაა იმ კარგი რეჟისორის შემოქმედებითი ფიასკო, მარცხი, რომელიც ადრე მართლაც ტალანტიურ ფილმებს იღებდა.

- მაგრამ ფილმში ხომ გლდანის საპყრობილეში მომხდარ საშინელებებია გადმოცემული - ადამიანების წამება, რომელსაც თავის დროზე თქვენც აპროტესტებდით?

- ეს გასაგებია, მაგრამ რატომ აჩვენებენ ფილმს 2016 წლის არჩევნების წინ? აშკარაა, რომ ხელისუფლებისთვის ახლა მნიშვნელოვანი „ერთიანი ნაციონალური მოძრაობის“ წინააღმდეგ ბრძოლაა. ამით მთავრობა მომაკვდავ პოლიტიკურ კლასს სიცოცხლეს უგრძელებს. ეს დაკვეთაა. არადა ის, რაც ადრე საპყრობილეებში ხდებოდა, შეიძლება შედარებით ნაკლებად, მაგრამ ახლაც გრძელდება, ის პირები ვინც მიხეილ სააკაშვილის დროს გლდანის ციხეში მუშაობდა, დღესაც იქ არიან და არცერთი სერიოზულად არ დასჯილა. მოკლედ, ამგვარი პროპაგანდიტული ფილმები ქართულ საზოგადოებაზე გავლენას ვერ მოახდენს, არ იმუშავებს.

- თქვენ თქვით, რომ ფილმი დაკვეთილიაო. მხედველობაში გყავთ მილიარდერი ბიძინა ივანიშვილი? ანუ ფილმი მან დააფინანსა?

- რა თქმა უნდა. აბა ფული საიდან გაჩნდებოდა? ეს ყველასათვის ნათელია. მე, ცხადია, პირადად არ შევსწრებივარ ფულის გადაცემის ფაქტს, მაგრამ გასაგებია, თუ როგორ მოხდა ეს ყველაფერი. მიმაჩნია, რომ ეს ბიძინა ივანიშვილის მხრიდან „კეთილი ინვესტიცია“ არ არის.

„ალბათ, ფილმის ავტორი და დამკვეთი იმედოვნებენ, რომ „ჰეროკრატია“ ისეთივე შოკურ ეფექტს მოახდენს, როგორიც თავის დროზე გლდანის ციხის ვიდეოკადრებმა მოახდინა. ვნახოთ“, - ამბობს რადიოკორესპონდენტი.