ინფორმაციის თავისუფლების განვითარების ინსტიტუტის (IDFI) მიერ სულ რაღაც ორიოდე კვირის წინ გავრცელებული ინფორმაცია ჩინოვნიკების, კონკრეტულად კი მინისტრების მიერ აღებული პრემიებისა და სახელფასო დანამატების რაოდენობის შესახებ, საზოგადოების განხილვის თემა გახდა და მასზე რამდენიმე დღის განმავლობაში ტოპ-ნიუსები იყო აგებული.
დღეს ამ თემამ შედარებით უკან გადაიწია, მაგრამ რჩება ნიუანსები, რომლებიც საკმაოდ მრავლისმეტყველი და დამაფიქრებელია.
პრემიებისა და სახელფასო დანამატების შესახებ ინფორმაციის გავრცელებისას, საზოგადოების მთავარი ყურადღება ენერგეტიკის მინისტრისა და ვიცე-პრემიერის მიერ აღებულმა თანხებმა მიიპყრო.
მართალია კახა კალაძის მიერ მიღებული თანხები ახლოსაც ვერ მივა თავდაცვის მინისტრ ირაკლი ალასანიას მიერ აღებულ თანხებთან, რომელმაც გასულ წელს, მხოლოდ პრემიებისა და დანამატების სახით 83 ათასი ლარი შეადგინა, მაგრამ საზოგადოების გაკვირვება ენერგეტიკის მინისტრის მიერ რამდენიმე თვის წინ გაკეთებულმა განცხადებამ გამოიწვია, რომლის თანახმადაც, ის ხელფასს საერთოდ არ იღებს და შრომის ანაზღაურებას მთლიანად ქველმოქმედებას ახმარს.
სწორედ ამან დააბნია საზოგადოება. ანუ რაში სჭირდება პრემია მინისტრს, რომელიც ხელფასსაც კი არ იღებს და რომლის ქონებრივი მდგომარეობაც, მოკრძალებულად სულაც არ გამოიყურება.
ამასთან, საზოგადოებაში მადლიერების გრძნობასთან ერთად გაჩნდა უკმაყოფილების გრძნობაც, რადგან, რა თქმა უნდა ქველმოქმედება კარგია, მაგრამ თუ ამას ბიუჯეტის ფულიდან აღებული პრემიებით აკეთებ, ეს უფრო თვალთმაქცობას ემსგავსება.
აქვე, აღსანიშნავია ერთი გარემოებაც, რომ საზოგადოებაში ბრენდირებულია სიტყვა „პრემია“, ხოლო სახელფასო დანამატის რაობის შესახებ ხალხმა შედარებით ნაკლებად იცის და აქედან გამომდინარე, ინფორმაციის თავისუფლების განვითარების ინსტიტუტის მიერ გავრცელებული მონაცემები, საზოგადოებამაც, მედიის წარმომადგენლებმაც და პოლიტიკოსებმაც მხოლოდ პრემიებს დაუკავშირეს.
შესაბამისად, პრემიებთან დაკავშირებულ აჟიოტაჟს სასწრაფოდ მოჰყვა ზოგიერთი მინისტრის განცხადება იმასთან დაკავშირებით, რომ მათ ამ რაოდენობით პრემია არ აუღიათ.
უფრო მეტიც, ენერგეტიკის მინისტრისა და ვიცე-პრემიერის პრესსამსახურის მიერ გავრცელებული განცხადების თანახმად, კახა კალაძეს გასულ წელს პრემია საერთოდ არ აუღია.
ინფორმაციის გადამოწმება სააგენტო „ნიუსპრესმა“ თავად IDFI-ში სცადა, სადაც განგვიცხადეს, რომ კალაძის პრესსამსახურის მიერ გავრცელებული განცხადება, მათ მიერ გამოქვეყნებულ ინფორმაციასთან წინააღმდეგობაში არ მოდის, რადგან კალაძეს 48 ათასი ლარის ოდენობით პრემია არ აუღია, მან ამ რაოდენობით მხოლოდ სახელფასო დანამატი აიღოო.
ძაღლის თავიც სწორედ აქაა დამარხული, რომ, როდესაც სახელმწიფოს ერთ-ერთი უმაღლესი თანამდებობის პირის პრესსამსახური აცხადებს, მინისტრს გასულ წელს პრემია საერთოდ არ აუღიაო, ავიწყდება განცხადებაშივე მიუთითოს ის, რომ კალაძემ 48 ათასის ოდენობით არა პრემია, არამედ სახელფასო დანამატი აიღო.
დამერწმუნეთ, მოსახლეობის აბსოლუტური უმრავლესობისთვის, რომლებსაც 48 ათასი სიზმარშიც კი არ უნახავთ და მათ უფრო ხშირად ლუკმა პური ესიზმრებათ, ნაკლებადმნიშვნელოვანია რა ერქმევა კალაძის მიერ სახელმწიფო ბიუჯეტიდან მიღებულ 48 ათასს, პრემია თუ სახელფასო დანამატი.
ინფორმაცია იმის შესახებ, რომ ენერგეტიკის მინისტრი თავის შრომის ანაზღაურებას მართლაც ქველმოქმედებაში ხარჯავს, სავარაუდოდ სინამდვილეს შეესაბამება და არც არანაირი საფუძველი არ გვაქვს მასში ეჭვი შევიტანოთ. სასურველია, რომ კალაძის სახელფასო დანამატიც საქველმოქმედო საქმიანობაში იყოს გახარჯული, მაგრამ აქ ერთი არცთუ სასიამოვნო ტენდენცია იკვეთება:
ენერგეტიკის მინისტრისა და ვიცე-პრემიერის აპარატმა თავის განცხადებაში ინფორმაცია იმის შესახებ, რომ კალაძემ 48 ათასი ნამდვილად მიიღო, საერთოდ დამალა და ისეთ უმარტივეს პიარ-ხერხს მიმართა, რომელზეც ზემოთ ვისაუბრეთ, როდესაც მათ აქცენტი მხოლოდ პრემიაზე გააკეთეს და ცნება - „სახელფასო დანამატს“ იგნორირება გაუკეთეს.
ასეთი რამ კი, საქართველოს ისტორიისთვის ერთ-ერთ ავბედით ხელისუფლებას ახასიათებდა, რომელიც საზოგადოების შეცდომაში შეყვანას, თუნდაც ტერმინებით მანიპულაციის გზით, საკმაოდ ხშირად ცდილობდა და ახერხებდა.
საზოგადოებას ეს ძალიან კარგად ახსოვს და არც გასაკვირია, რომ ნებისმიერი მსგავსი ფაქტის წინაშე ხალხს განსაკუთრებული რეაქცია ექნება.
საერთოდ კი, (ეს მხოლოდ კალაძეს არ ეხება) რა სახით მიიღებენ ჩინოვნიკები სახელმწიფო ბიუჯეტიდან ხელფასით განსაზღვრულზე მეტ თანხას, ერქმევა მას პრემია, სახელფასო დანამატი თუ ერთჯერადი წახალისება, საზოგადოებისთვის და ბიუჯეტისთვისაც ამას არანაირი მნიშვნელობა არ აქვს.

გიორგი აბრამიშვილი