რა ხდება თავდაცვის სამინისტროში, ვინ იღებს გადაწყვეტილებებს, რა შეიცვალა უწყებაში ხელისუფლების შეცვლის შემდეგ და რა განწყობაა ჯარში, ამასთან დაკავშირებით საინფორმაციო სააგენტო „ნიუსპრესს“ თავდაცვის სამინისტროს თანამშრომელი ესაუბრა, რომელიც ერთ-ერთ ნაწილში მსახურობს.
-რა ხდება ჯარში და რატომაა ჯარისკაცებში ნეგატიური განწყობა როგორც შენ ამბობ?
-ჯარში არაფერი არ ხდება და არც მომხდარა მას შემდეგ, რაც ქვეყანაში ხელისუფლება შეიცვალა. უფრო მეტიც, ისინი ვინც „ნაციონალური მოძრაობისა“ და მიხეილ სააკაშვილის ყველაზე დიდი მხარდამჭერები იყვნენ და მათ ყველა ქმედებას ამართლებდნენ, დღესაც თანამდებობებზე არიან და უფრო მეტიც, დაწინაურდნენ კიდეც. ზოგს ჩინი მოუმატეს, ზოგს კიდევ ხელფასი და თანამდებობა.
თავიდან ჩუმად იყვნენ და ყაზარმაში კი არა, მიხეილ სააკაშვილის ხსენებას პირად საუბრებშიც ვერ ბედავდნენ, დღეს კი აიშვეს და უკვე პოლიტიკურ დისკუსიებს მართავენ.
-ეს იწვევს ჯარისკაცების უკმაყოფილებას?
-კი ეს იწვევს, ყველაფერს ვერ გეუბნებით, მაგრამ ჩვენი ნაწილის ოფიცერი, რომელიც 2012 წელს, სანამ „ოცნება“ გაიმარჯვებდა, ბიძინა ივანიშვილზე ისეთ რაღაცებს ამბობდა, რომ გამეორებაც უხერხულია, მერე ერთად იკრიბებოდნენ და ივანიშვილს ხმამაღლა აგინებდნენ, დღეს ეს ოფიცერი დაწინაურებულია, ამას ყველაფერს ჯარი ხედავს.
-წეღან მითხარი, დაძახების შემთხვევაში იარაღით გამოსასვლელად მზად არიანო...
-იარაღით არ ვიცი, მაგრამ ერთ-ერთი პოლიტიკური დისკუსიის დროს, ჩვენი ნაწილის ერთ-ერთმა ხელმძღვანელმა ოფიცერმა პირდაპირ თქვა, დამიძახონ და არწამსვლელის დედაცო.. წასვლაში რას გულისხმობდა თქვენ დაასკვენით. ვერ ვიტყვი, რომ ბევრნი არიან, მაგრამ ჩვენ ნაწილში, თანამდებობრივად, „პარადი“ ისევ მაგათ მიჰყავთ. ასეთი ხალხის გაყრას რა უნდა, არც დიდი პროფესიონალები მყვანან, რო მაგათი წასვლით ჯარს რამე დააკლდეს. მთავარია ხელმძღვანელობიდან მოაშორო ეგეთი ხალხი, ვისაც სამსახურზე მეტად პოლიტიკური ერთგულება აინტერესებს და რიგითებს თავისით დაავიწყდებათ სააკაშვილიც და ახალაიაც. ამ ოფიცრებს თავიანთი თანამოაზრე რიგითები და კაპრალებიც ჰყავთ და მაგათ ზემდეტი ყურადღებით ექცევიან.
შინაგან საქმეთა სამინისტროში ხომ მოხდა ისე, რომ მარტო ის ხალხი გაუშვეს, ვინც ხელმძღვანელობაში იყო და ვინც სხვებს აიძულებდა პოლიტიკური პოლიციელი ყოფილიყო. არ შეიძლება ასე უმტკივნეულოდ ეს თავდაცვაშიც მოხდეს? რას აკეთებს ალასანია, მითხარით რა გაუკეთა ჯარს გამინისტრების შემდეგ?
ერთადერთი რაც გააკეთა, კომპენსაციების თანხები გაზარდა, მაგრამ აუცილებლად უნდა მოვკვდე ან დავსახიჩრდე, რომ მაგისგან ყურადღება ვიგრძნო? სხვა თუ არაფერი, ამ ნაციონალებისგან მაინც გაწმინდოს სამინისტრო, გული გასკდა ამათი შემყურე.
-ჯარში საკვებით მოწამვლის შემთხვევების გახშირების შესახებ ბოლო დროს ბევრი არასამთავრობო საუბრობს. თქვენთან თუ დაფიქსირდა მსგავსი შემთხვევები?
-ჩვენთან საკვებით მოწამვლის შემთხვევა საბედნიეროდ ჯერჯეობით არ დაფიქსირებულა, თუმცა არასამთავრობოების იმ ინფორმაციების დიდი ნაწილი, რომელსაც ისინი ახმოვანებენ და რომლის შესახებაც თქვენ მესაუბრებით, 100 პროცენტიანი სიმართლეა. კი გითხარი ჩვენთან არავინ მოწამლულათქო, მაგრამ დაზღვეულები არა ვართ, რომ მსგავსი ფაქტი ხვალ-ზეგ ჩვენ ნაწილშიც არ მოხდება.
-რატომ?
-იმიტომ, რომ როგორც გითხარი, ჯარში არაფერი შეცვლილა და არც ის ხალხი შეუცვლიათ, ვინც ჯარისკაცების კვებას უზრუნველყოფდა. ადრე კიდევ, ჯარის გამოსაკვებად ტენდერებს როგორ იგებდნენ და ამისთვის როგორ პარტიულ ერთგულებას ითხოვდნენ ყველამ იცის. სწორედ ის ხალხი კვებავს დღესაც ჯარს, ვინც მიხეილ სააკაშვილის დროს კვებავდა და გამორიცხული არ არის, რომ ახალი ხელისუფლების და თუნდაც, იგივე ალასანიას „გაიაფების“ მიზნით, შეგნებულად, მსუბუქი მოწამვლის გამომწვევი ნივთიერებებით წამლავდნენ ხალხს. ამიტომ ვამბობ დაზღვეულები არ ვართ-თქო.
მარტო კამერების წინ „ატჟიმანიების“ კეთება კი არა, ჯარს პატრონობა და მიხედვა სჭირდება, ჯარი ისეთი რამეა პიარით ვერ გააბრიყვებ და ვერც შეურაცხყოფას გადააყლაპებ. ჩვენი პრობლემებით და თავდაცვაში არსებული ვითარებით პირველ რიგში, მინისტრი უნდა ინტერესდებოდეს.

ესაუბრა ნატალია ქობალია