საქართველოს პრეზიდენტმა მიხეილ სააკაშვილმა ბაქო-თბილისი-ყარსის რკინიგზის მშენებლობის ტემპის დაცემის გამო უკმაყოფილება გამოთქვა. აღნიშნულ განცხადებას, კომპანია „მარაბდა კარწახის რკინიგზის“ მენეჯმენტი გამოეხმაურა, რომელიც ამ პროექტს ახორციელებს.
„newspress“-ი საკითხთან დაკავშირებით კომპანიის დირექტორ ირაკლი წულაიას ესაუბრა.
ბატონო ირაკლი, სააკაშვილმა რკინიგზის მშენებლობის ტემპის შენელებასთან დაკავშირებით უკმაყოფილება გამოთქვა. თქვენ კი აღნიშნულ ინფორმაციას უარყოფთ, რა ხდება რეალურად?
სიმართლე გითხრათ ვერანაირად ვერ ჩავაღწევ სააკაშვილის ტვინამდე ვერ ამოვიღებ, რა უდევს მასში და რატომ აკეთებს ასეთ განცხადებებს. ფაქტი კი ის არის, რომ რეალურად მშენებლობის ტემპი დღეს რვაჯერ უფრო დაჩქარებულია. ივნისი-მაისის შესრულებით ბაქო-თბილისი-ყარსის მშენებლობის ისტორიაში რეკორდი დავამყარეთ. ასე რომ, ციფრები ერთს ამბობენ და სააკაშვილი მეორეს.
ეს განცხადებები პროექტს რაიმე სახის ზიანს ხომ არ მიაყენებს?
რა თქმა უნდა მიაყენებს. ნატოსთან მოლაპარაკებები ფაქტობრივად უკვე შეთანხმებამდეა მისული და ეს განცხადებები ამ შეთანხმებას ხელს უშლის.
მოგეხსენებათ, 2014 წელს, ნატოს ISAF-ის მისიის დასრულების შემდეგ, ტვირთების გადმოზიდვა აზერბაიჯანის და საქართველოს გავლით, ბაქო-თბილისი-ყარსის რკინიგზის მეშვეობით იგეგმება.
სააკაშვილი რაღაც გეოპოლიტიკურ-სტრატეგიულ თამაშებში გვადანაშაულებს. მაშინ ასე გამოდის, რომ ამ თამაშებში აზერბაიჯანული და თურქული მხარეც არის ჩართული. პრეზიდენტს თითქოს ამ წლის ბოლოს უნდა დაემთავრებინა ამ რკინიგზის მშენებლობა და რეალურად ოთხი წლის განმავლობაში მხოლოდ 28% აქვს შესრულებული. ერთ წელში დარჩენილი 72%-ის შესრულებას როგორ აპირებდა? ეს წარმოუდგენელია. ასევე, მას რეალურად რომ დაემთავრებინა მარაბდა-კარწახის მონაკვეთი, რაც ფაქტიურად შეუძლებელია, ხომ ყველასთვის ცნობილია, რომ ეს პროექტი მარტო საქართველოს მონაკვეთს არ მოიცავს, ის თურქეთის და აზერბაიჯანის მონაკვეთზეც შენდება. რკინიგზა რომც გაეხსნა, ფაქტიურად გამოუყენებელი იქნებოდა. მარაბდიდან კარწახამდე მატარებლით თუ ისეირნებდა, თორემ მატარებელი ვერც აზერბაიჯანიდან შემოვიდოდა და ვერც თურქეთიდან გავიდოდა, რადგან იქ რეალურად პროექტი 2014 წელს სრულდება.
თქვენი განცხადებით, პროექტის მეშვეობით თანხების მითვისება ხდებოდა და ამ საკითხთან დაკავშირებით გამოძიება მიმდინარეობს. ეს ხომ არ არის აგრესიის მიზეზი?
ფაქტია, რომ აქ კადრები ცენტრალური ხელისუფლების მიერ ინიშნებოდა და მათ ხელისუფლება აკონტროლებდა. ამიტომაც პასუხისმგებლობა როგორც აქაურ ხელისუფლებას, ასევე ძველ ხელისუფლებას ეკისრება. უფრო დეტალურ განცხადებას კი, ალბათ პროკურატურა გააკეთებს.