ყოველგვარი წინააღმდეგობის გარეშე დაგვაკავეს, ძირს დაგვყარეს და უმოწყალოდ გვცემდნენ;

სამართალდამცავები ჩვენგან აღიარებით ჩვენებას ითხოვდნენ, რომ თითქოს ჩვენი მანქანა დაეჯახა იმ პოლიციელს, რომელიც შემდგომ აქციაზე გარდაცვლილად გამოცხადდა;

სამმართველოში სასწაული ხდებოდა, ყველა უმოწყალოდ იყო ნაცემი, მსგავსი რამ არ მინახავს;

გენერალ თამაზ თამაზაშვილის საქმეზე დაკავებულ პოლიციელებს შორის, ყოფილმა პოლიტპატიმარმა კობა გოცირიძემ, ერთ-ერთ დაკავებულში ის პიროვნება ამოიცნო, რომელიც 2011 წლის 26 მაისს, მისი წამების პროცესს პირადად ხელმძღვანელობდა.

ყოფილი პოლიტპატიმრის განცხადებით, პიროვნება, რომელიც მასზე და სხვა დაკავებულებზე ფიზიკურ და ფსიქოლოგიურ ზეწოლას ახორციელებდა, - გრიგოლ კვინიკაძეა.

26 მაისს მისი წამების შესახებ, „ნიუსპრესს“ თავად კობა გოცირიძე ესაუბრება.

ბატონო კობა, როგორ მოხდა 26 მაისს თქვენი დაკავება და სამმართველოში გადაყვანა?

2011 წლის 26 მაისის აქციის დროს, როდესაც ცრემლსადენი გაზი გაუშვეს და აქციის მონაწილეების დარბევა დაიწყო, მე და ჩემმა მეგობრებმა მანქანით დავიწყეთ გადაადგილება, რომელიც შიდა ტერიტორიაზე გვყავდა გაჩერებული. არ ვიცი რატომ, მაგრამ ჩვენს მანქანაზე განსაკუთრებული ყურადღება იყო გამახვილებული. თავისუფლების მოედანზე ჩვენი მანქანის მიმართულებით დაიწყეს სროლა, სანაპირომდე პოლიციის მანქანებით მოგვსდევდნენ და გვესროდნენ. გადავწყვიტეთ თავი რომელიმე საელჩოსთვის შეგვეფარებინა. ვაკეში, ჩეხეთის საელჩოსთან ავტოავარიაში მოვყევით, საელჩოს კედელს შევეჯახეთ და ამის გმო ვეღარ მოვახერხეთ შენობაში შესვლა. მხოლოდ ერთმა ჩვენმა მეგობარმა, რომელიც მანქანას მართავდა, მოასწრო და შენობაში შევიდა. ყოველგვარი წინააღმდეგობის გაწევის გარეშე ჩვენ ადგილზე დაგვაკავეს, ძირს დაგვაწვინეს და უმოწყალოდ გვცემდნენ. ეს დაახლოებით ერთი საათის განმავლობაში გრძელდებოდა. შემდეგ კი პოლიციის სამმართველოში გადაგვიყვანეს სადაც უკვე ჩვენი წამება დაიწყო.

რა ხდებოდა სამმართველოში, როგორ გეპყრობოდნენ თქვენ და სხვა დაკავებულებს?

სამართალდამცავები ჩვენგან აღიარებით ჩვენებას ითხოვდნენ, რომ თითქოს ჩვენი მანქანა დაეჯახა იმ პოლიციელს, რომელიც შემდგომ, აქციაზე ესკორტის დაჯახების შედეგად გარდაცვლილად გამოცხადდა. სამმართველოში სასწაული ხდებოდა, ყველა უმოწყალოდ იყო ნაცემი, მსგავსი რამ არც მინახავს. როგორ შეიძლება შენივე ქვეყნის შვილს ასე მოექცე რაც არ უნდა დამნაშავე იყოს ის, მითუმეტეს რომ ჩვენ არანაირი დანაშაული არ ჩაგვიდენია.

თქვენ, იმ პირებს შორის ვინც პატიმრებს აწამებდნენ, შინაგან საქმეთა სამინისტროს ერთ-ერთი მაღალჩინოსანი ამოიცანით, რომელიც ამჟამად დაკავებულია, ვინ არის ეს პიროვნება და რა სახის ზეწოლას ახორციელებდა დაკავებულებზე?

მე მხოლოდ ეს პოლიციელი არ ამომიცვნია, 26 მაისის საქმეზე როდესაც გამოძიება მიმდინარეობდა, იმ სამართალდამცავებიდან ვინც გვაწამებდა, რამდენიმე მაღალჩინოსანი ამოვიცანი. ამის შესახებ პროკურატურასაც 26 მაისის საქმის გამოძიების დროსაც განვუცხადე, შემდეგ კი, როდესაც ტელევიზიით გავრცელდა ინფორმაცია, რომ თამაზ თამაზაშვილის საქმეზე პოლიციელები დააკავესო, კადრების ნახვის დროს გრიგოლ კვინიკაძეც ამოვიცანი.

ანუ ეს ადამიანი პირადად მონაწილეობდა პატიმრების წამებაში?

დიახ. მე პირადად როდესაც დამაკავეს და სამმართველოში გადამიყვანეს, ჩემი წამება და ფსიქოლოგიური ზეწოლა, პირადად გრიგოლ კვინიკაძის ხელმძღვანელობით ხდებოდა. თავად კვინიკაძე მიტარებდა დაკითხვას და ჩემგან აღიარებით ჩვენებას ითხოვდა.

აპირებთ თუ არა მის ქმედებებთან დაკავშირებით გამოძიებასთან თანამშრომლობას?

კვინიკაძის ამოცნობის შემდეგ, პროკურატურაში ჩვენების მისაცემად დამიბარეს.
შესაბამისად, მე გამოძიებას ჩვენება უკვე მივეცი, მეტს კი ამ ეტაპზე, ისევ გამოძიების ინტერესებიდან გამომდინარე, ვერაფერს ვერ ვიტყვი.

ლიკა მეგუთნიშვილი
საინფორმაციო სააგენტო „ნიუსპრესი“