„საქართველოს პარლამენტის თავმჯდომარე პოლონეთში მხარდაჭერის მოპოვებას შეეცდება“ - ამ სათაურით აქვეყნებს დავით უსუფაშვილთან და თედო ჯაფარიძესთან ინტერვიუს პოლონური საინფორმაციო სააგენტო (PAP)-ი.

პარლამენტის თავმჯდომარის მიერ პოლონური სააგენტოსთვის მიცემულ ინტერვიუს „ნიუსპრესი“ სრულად გთავაზობთ.

PAP:რა არის პოლონეთში საქართველოს დელეგაციის ვიზიტის მიზანი?

-დ. უსუფაშვილი: ეს არის ახლად არჩეული პარლამენტის (PAP-ის შენიშვნა: 2012 წლის ოქტომბრის საპარლამენტო არჩევნების შემდეგ) დელეგაციის პირველი ოფიციალური ვიზიტი ევროპაში. დელეგაციის შემადგენლობაში შედის პარლამენტის ხუთი წევრი, მათ შორის ოპოზიციიდან - „ერთიანი ნაციონალური მოძრაობის“ წარმომადგენელი. გვსურს, შვხვდეთ საგარეო პოლიტიკის, სამხრეთ კავკასიისა და ევროინტეგრაციის საკითხებზე მომუშავე წამყვან თანამდებობის პირებს, რათა გადავცეთ მნიშვნელოვანი გზავნილი: წარმოვადგენთ ახალ მთავრობას, მაგრამ იმავე საქართველოს, იმავე ქვეყანას, რომელიც მიისწრაფვის იმისკენ, რომ გახდეს ევროპული დემოკრატიული ცივილიზაციის განუყოფელი ნაწილი. ევროკავშირთან ახლო ურთიერთობა და ნატო-ს წევრობა ჩვენს ძირითად მიზნებად რჩება. ახალი მთავრობის ამ მიზნებს კვლავ ხაზი გაესვა ერთი თვის წინ, პარლამენტის მიერ მიღებულ რეზოლუციაში. არჩევნებამდე და არჩევნების შემდეგ გაჩნდა კითხვები, მთავრობის შეცვლის შემდეგ ქვეყანაში მოსალოდნელი ცვლილებების შესახებ. გვსურს ყველას განვუცხადოთ: დიახ, იქნება ცვლილება, მაგრამ ეს იქნება ცვლილება მეტი დემოკრატიისა და უფრო პრაგმატული საგარეო პოლიტიკის მიმართულებით, რაც ქვეყანას უფრო პროგნოზირებადსა და ჩვენი მეგობრებისთვის სანდო პარტნიორს გახდის.

-PAP: რა კონკრეტულ თემებზე გექნებათ საუბარი?

დ. უსუფაშვილი: ვატარებთ ადგილობრივი თვითმმართველობის რეფორმას, რომელიც აქამდე მართვის უაღრესად ცენტრალიზებული სტრუქტურის ნაწილი იყო. ეს რეფორმა არის ევროპარლამენტსა და ევროსაბჭოში ჩვენს ევროპელ მეგობრებთან, მჭიდრო ურთიერთობებისა და დისკუსიის საგანი. ვიცით, რომ პოლონეთს ამ დარგში კარგი გამოცდილება აქვს და მოვითხოვთ, რომ ჩვენმა მეგობრებმა გააგრძელონ თანამშრომლობა, რადგან ამჯერად მოლაპარაკებები შედეგს გამოიღებს. სხვა შიდა საკითხთა შორის არის დამოუკიდებელი სასამართლო სისტემის მშენებლობა. პარლამენტმა მიიღო კანონი, რომელიც ცვლის სასამართლო მართვის ადმინისტრაციის ჩამოყალიბების წესს. ეს არის შიდა რეფორმების მაგალითები, რომლებიც გვსურს განვუმარტოთ ჩვენს კოლეგებს პოლონეთში, რათა დავარწმუნოთ ისინი, რომ ქვეყანას მართლაც სერიოზული დემოკრატიის გზაზე ვაყენებთ.

-PAP: რას მოელის პოლონეთის წარმომადგენლებისგან დელეგაცია?

დ. უსუფაშვილი: როდესაც კოალიცია „ქართული ოცნება“ მოვიდა ხელისუფლებაში, მრავალი ადამინი უსვამდა თავს კითხვას, რამდენად შესაძლებელია, ამ პატარა ქვეყანას ჰყავდეს ორი პოლიტიკური გუნდი, რომლებიც იქნებიან თანაბრად მიზანმიმართულნი, გააგრძელონ საგარეო პოლიტიკის პრიორიტეტები, რასაც იშვიათად ჰქონდა ადგილი რეგიონში. იმედი მაქვს, რომ როდესაც პოლონეთს დავტოვებთ, ჩვენი კოლეგები უფრო კარგად გაუგებენ ახალ მთავრობას, რაც იმას ნიშნავს, რომ, ყოველგვარი ყოყმანის, კითხვის ნიშნებისა და მოსალოდნელ რისკზე დაფიქრების გარეშე უკეთ შეძლებენ ქვეყნის შემდგომ მხარდაჭერას.
თ. ჯაფარიძე: პოლონეთს აქვს განსაკუთრებული მისია, აქვს ისტორიული კავშირები საქართველოსთან. პოლიტიკურად, პოლონეთი არის ქვეყანა, რომელიც გახლავთ ლიდერი ამჟამინდელ ცენტრალურ ევროპაში. ვიცით, რომ ნატო-ში და ევროკაშირში გაწევრიანება უახლოეს მომავალში არ მოხდება, მაგრამ არ გვსურს დავუბრუნდეთ იმ ადგილს, რომელიც ადრე გვეკავა. ვიმყოფებით ერთგვარ გარდამავალ ზონაში და პოლონეთის, როგორც ცენტრალური ევროპის ლიდერის მისია არის, ჩვენი ამ სიტუაციიდან გამოყვანა.

-PAP: არის თუ არა ეს ვიზიტი პასუხი საქართველოს ახალი ხელისუფლების მიმართ ევროკავშირის ისეთ კრიტიკულ გამოხმაურებაზე, როგორიცაა მაგ. ევროპის სახალხო პარტიის დეპუტატთა ბოლო ღია წერილი?

დ. უსუფაშვილი: კრიტიკა ყოველთვის იქნება. ჩვენ დიდი ყურადღებით ვღებულობთ ამას, მაგრამ, ამასთანავე, ზოგჯერ ვხედავთ უსაფუძვლო კრიტიკას და უკვე წინასწარ უარყოფითად განწყობილ პოლიტიკურ პოზიციას. ჩვენ გვინდა ყველას ვუთხრათ, რომ მზად ვართ მწვავე საუბრისთვის. სწორედ ამიტომ პრემიერ-მინისტრი (ბიძინა ივანიშვილი) მოითხოვდა ევროკავშირისგან, რათა მას მოევლინა სპეციალური წარმომადგენელი, რომელიც დააკვირდებოდა, თუ რა ხდება ადამიანის უფლებათა დაცვის, საკანონმდებლო და სხვა სფეროებში. წარმომადგენლად დაინიშნა ტომას ჰამარბერგი, ერთ-ერთი ყველაზე პატივცემული და გამოცდილი ადამიანი ამ სფეროში (შვედი დიპლომატი, ევროპის საბჭოში ყოფილი ადამიანის უფლებათა კომისარი - PAP-ის შენიშვნა).

-PAP: რისი მიღწევა უნდა საქართველოს ვილნიუსის აღმოსავლეთ პარტნიორობის ნოემბრის სამიტზე?

დ. უსუფაშვილი: სურს მოიპოვოს მტკიცე გადაწყვეტილება, რომ ჩვენ წარმატებით შევასრულეთ აღმოსავლეთ პარტნიორობის პროცესში გათვალისწინებული საშინაო დავალება, რომ ევროკავშირთან ურთიერთობა არის ინტენსიური და ჩანს პროგრესი, რომ ვართ ახალ, უკეთეს და მჭიდრო ურთიერთობების ეტაპზე. ამასთან, არ გვინდა არარეალური მოლოდინი, რაც უპირველეს ყოვლისა ძვირად დაუჯდებოდა ქართველ ერს, რომელიც არ იმსახურებს კიდევ ერთ იმედგაცრუებას. ჩვენთვის ევროინტეგრაცია არის ინსტრუმენტი ჩვენი ქვეყნის გაუმჯობესებისთვის და არა საბოლოო წერტილი. ეს ინსტრუმენტი იმისთვის გვინდა, რათა ჩვენი ქვეყნა გახდეს წარმატებული, უფრო დემოკრატიული, რომ ხალხმა შეიგრძნოს ინტეგრაციის შედეგი. ამიტომ არ გვსურს ამოსავალი წერტილის განსაზღვრა, როგორც ამას ადრე აკეთებდა პრეზიდენტი (მიხეილ სააკაშვილი). ასე, რომ თუ ვისაუბრებთ სამიტზე, ვართ ენთუზიაზმით სავსე და ძალიან ოპტიმისტურად განწყობილნი, მაგრამ ამ კონტექსტზე მთელი ქვეყნის მომავლის დაყენებას არ ვაპირებთ. ველით, რომ ჩვენი მეგობრები წინასწარ გვაცნობებენ, მოსალოდნელი გადაწყვეტილებების შესახებ, რადგან ამგვარი გადაწყვეტილებები შეხვედრის ბოლო წუთებში არ მიიღება. ამ ეტაპზე, ყველა გადაწყვეტილების მიღების პროცესშია და ჩვენ, ამ პროცესის ნაწილი გვინდა ვიყოთ.

-PAP: ევროკავშირის წარმომადგენლები ბოლო პერიოდში აცხადებდნენ, რომ სურთ სამიტზე ხელი მოაწერონ უკრაინასთან ასოცირების შესახებ შეთანხმებას და დაასრულონ შეთანხმებასთან დაკავშირებული მოლაპარაკებები, მათ შორის საქართველოსთან. ეს არის საქართველოს მიზანი აღმოსავლეთ პარტნიორობის სამიტზე?

დ.უსუფაშვილი: ამ ეტაპზე, ჩვენ გვინდა ასოცირების შესახებ შეთანხმება. თუკი ჩვენი პარტნიორები განგვიმარტავენ და დაგვარწმუნებენ, რომ ეს შეუძლებელია კონკრეტული მიზეზების გამო, შეგვიძლია დავფიქრდეთ. ამ ეტაპზე, მე არ ვიცი არც ერთი მიზეზი, რომელიც მაფიქრებინებს, რომ არ ვიმსახურებთ შეთანხმების გაფორმებას. კიდევ არის დრო და ამ საკითხებზე მტკიცედ უნდა ვიმუშაოთ. მე ამ შემთხვევაში ოპტიმისტი ვარ, მჯერა, რომ სამიტამდე დარჩენილი თვეები დაარწმუნებს ყველას, რომ თუკი ნებისმიერი სხვა კანდიდატი ქვეყანა მზად არის, მაშინ საქართველოც ასევე მზად იქნება.

-PAP: დასავლეთი საქართველოში არსებულ მდგომარეობას არასწორად აღიქვამს?

თედო ჯაფარიძე: უპირველეს ყოვლისა, მე მესმის, რომ საქართველო არ არის მთავარი პრიორიტეტი გადაწყვეტილების მიმღებ არც ევროპელთათვის, არც ამერიკელთათვის ანდა გლობალური მასშტაბით. თუმცა, ჩემი რჩევაა არა მარტო მიუკერძოებლობა, არამედ ასევე პოლიტკორექტულობა, რადგან რაც არ უნდა დაიწეროს საქართველოს შესახებ, მხოლოდ საქართველოს, როგორც გეორგაფიულ ნაწილს, არ ეხება. იფიქრეთ საქართველოზე, როგორც სტრატეგიულ ქვეყანაზე, რუსეთისა და თურქეთის და გარკვეულწილად ირანის მეზობელ ქვეყანაზე; რომელიც მდებარეობს იმ ადგილზე სადაც გადის მილსადენები, როგორც ტრანზიტულ ქვეყანაზე, რომელიც აკავშირებს სამხრეთ კავკასიასა და ცენტრალურ აზიას. თუკი მას ასე შევხედავთ, ის ბევრად უფრო მნიშვნელოვანია. ამიტომ მე ვურჩევდი ექსპერტებს, ანალიტიკოსებს, ჟურნალისტებს იყვნენ უფრო ყურადღებიანი. ისეთ ქვეყნებში, როგორიცაა საქართველო, დიდი მნიშვნელობა აქვს ნიუანსებსა და დეტალებს, თუკი ისინი არ იცი, შენი შეფასება ზედაპირულია. მსოფლიო გლობალიზებულია და არ აქვს მნიშვნელობა ქვეყანა პატარაა თუ დიდი, რადგან ყველაფერი ურთიერთკავშირშია, ამიტომ ვამბობ - შეხედეთ საქართველოს კონტქსტში.