მოსკოვში ნანი ბრეგვაძე დიდი სოლო-კონცერტით გამოდის. საბჭოთა კავშირის სახალხო არტისტი თავის ცნობილ ჰიტებს ასრულებს საქართველოს დიდი სიმფონიური ორკესტრის თანხლებით, რომელსაც ნიკოლოზ რაჭველი ხელმძღვანელობს. „იზვესტიის“ კორესპონდენტი ნატალია ვასილიევა შეხვდა და ესაუბრა საბჭოთა ესტრადის ლეგენდას.

საინფორმაციო სააგენტო "ნიუსპრესი" გთავაზობთ ამონარიდებს ინტერვიუდან:

- თქვენში ყოველთვის ბევრი სითბო და სიკეთეა...

- სიკეთე ხელს უწყობს ადამიანებსა და სახელმწიფოებს შორის მშვიდობას, ამაზე ყოველი ჩვენგანი უნდა ფიქრობდეს. ეს საჭიროა, რათა კვლავ დავუახლოვდეთ ერთმანეთს, როგორც ეს ადრე იყო. სამწუხაროდ, ქართველებს კვლავ არ აქვთ რუსეთში თავისუფლად შესვლის უფლება, რუსებს კი აქვთ. არ იფიქროთ, რომ მე პოლიტიკაში გადავდივარ. მე მხედველობაში მაქვს ადამიანური ურთიერთობები, ჩვენი მოთხოვნილება მეგობრობაზე და სიყვარულზე. ჩვენ ყოველთვის გვიხარია, როცა საქართველოში რუსები ჩამოდიან. ჩვენი სტუმართმოყვარეობა უსაზღვროა. ჩვენ ძალიან ვცდილობთ რომ სტუმრებს ვასიამოვნოთ, ყველაფერს ვაკეთებთ მათთვის. ჩვენ თითქოს მათთვის ვცხოვრობთ. როცა საქართველოში რუსი სტუმრები მოდიან და მოგვმართავენ, უფრო ბედნიერები ვხდებით, მტრობა არ გვაქვს. მაგრამ ჩვენი ახალგაზრდები [რუსეთისაგან] თავს შორს იჭერენ და ამბობენ: „რატომ არ გვიშვებენ თავისუფლად რუსეთში? ჩვენ ხომ რუსებს ჩამოსვლაში ხელს არ ვუშლით და მათ გულღიად ვხვდებით“. ჩვენ, უფროსი თაობა, მათ ვუხსნით, რომ ამას მნიშვნელობა არ აქვს. მთავარია დავხვდეთ მათ კარგად, მთავარია ადამიანებმა დაინახონ, თუ როგორ კარგად ვეპყრობით რუსეთს და რუს მოქალაქეებს. მე ძალიან მინდა, რომ ჩვენმა ახალგაზრდებმა ისე გაიცნონ და შეიყვარონ რუსეთი, როგორც ამას თავის დროზე ჩვენ ვაკეთებდით. ჩვენ ერთი მთლიანნი ვიყავით, ერთად ვიზრდებოდით. ძალიან მწყინს, რომ დღეს სიტუაცია სრულიად სხვაგვარია. ძალიან მინდა, რომ თქვენ შეიყვაროთ საქართველო. ყველას გიწვევთ ჩემი სიმღერის მოსასმენად. კულტურა ადამიანებს ერთმანეთთან აახლოებს. ეს ვიცი და ამიტომაც ვმღერი.

-თქვენ მთელი შემოქმედებითი ცხოვრების მანძილზე მხოლოდ ორჯერ თუ სამჯერ იმღერეთ ფონოგრამით...
- კი, მხოლოდ ორჯერ-სამჯერ... მომღერლებმა ცოცხლად უნდა იმღერონ. ცოცხლად მღერას და ფონოგრამას შორის დიდი განხვავებაა. ცოცხლად როცა მღერი, ყოველი შენი გამოსვლა თავისებურად ორიგინალურია, ფონოგრამით კი ყველა ერთნაირად ჟღერს. ფონოგრამით მომღერალი სცენაზე დიდხანს ვერ გაძლებს. არავის ვამცირებ ჩემი ლაპარაკით, ვისაც როგორ უნდა ისე იმღეროს, უბრალოდ, მსმენელი არ უნდა მოატყუო.


წყარო: «Известия» (რუსეთი)