კახეთის რეგიონში, თელავისა და ყვარელის მუნიციპალიტეტებში მევენახეობის სასოფლო -სამეურნეო კოოპერატივების ხელშეწყობის სახელმწიფო პროგრამის ფარგლებში ყურძნის გადამამუშავებელი სამი საწარმო შენდება.

მშენებლობის მიმდინარეობა სოფლის მეურნეობის მინისტრის მოადგილემ, გიორგი ხანიშვილმა და სასოფლო-სამეურნეო კოოპერატივების განვითარების სააგენტოს თავმჯდომარემ, გიორგი მიშელაძემ დაათვალიერეს.

„მომავალ წელს მევენახეობის მიმართულებით გაცილებით მეტი კოოპერატივი დაფინანსდება, უკვე რამდენიმე წლის შემდეგ ჩვენ საშუალება გვექნება ვიფიქროთ არა მხოლოდ ყურძნის გადამამუშავებელ საწარმოებზე, არამედ კოოპერატივების მიერ წარმოებული ბრენდირებული ღვინის გაყიდვაზე, რომელიც კოოპერატივების ბრენდის სახელით გავა საერთაშორისო ბაზარზე“ - განაცხადა გიორგი ხანიშვილმა.

სახელმწიფო პროგრამაში მონაწილე სასოფლო-სამეურნეო კოოპერატივებში „შატო აკურა“, „საბა“ და „გავაზის საუკეთესო ვენახები“ გაერთიანებულია ჯამში 60 -ზე მეტი მეპაიე, ხოლო კოოპერატივებში მობილიზებული ვენახი 70 ჰა-ზე მეტს შეადგენს.

პროგრამაში მონაწილე კოოპერატივებიდან თითოეული 100 ტონა ყურძნის პირველადი გადამუშავებისათვის საჭირო აღჭურვილობას მიიღებს.

პროგრამაში მონაწილე კოოპერატივის წევრებს ასევე საშუალება ეძლევათ სარგებელი ყურძნის რეალიზაციის გარდა, უკვე ღვინის რეალიზაციიდან მიიღონ.

სოფლის მეურნეობის სამინისტროს ინფორმაციით, პროგრამის ფარგლებში კოოპერატივებს ჩაუტარდებათ სწავლება, როგორც ღვინის საწარმოს ფუნქციონირებასთან დაკავშირებულ ტექნიკურ და მეთოდოლოგიურ საკითხებზე, ასევე საქართველოს კანონმდებლობით დადგენილ სხვა სპეციფიკურ მოთხოვნებთან დაკავშირებით.