ქართული კომპანიების ავღანეთის ბაზრებზე საქმიანობის შესაძლებლობა განიხილა ავღანეთის ფინანსთა მინისტრმა იქლილჰაკიმიმ ადგილობრივი ბიზნესის წარმომადგენლებთან. შეხვედრა თბილისის სასტუმრო „რედისონში“ საქართველოს ფინანსთა სამინისტროსა და სავაჭრო-სამრეწველო პალატის ორგანიზებით გაიმართა. შეხვედრაში მონაწილეობდნენ ფინანსთა მინისტრის მოადგილე ნიკოლოზ გაგუა და სავაჭრო-სამრეწველო პალატის პრეზიდენტი ნინო ჩიქოვანი. შეხვედრას ასევე დაესწრნენ ეკონომიკისა და მდგრადი განვითარების სამინისტროს სსიპ „აწარმოე საქართველოში“ წარმომადგენლები.
შეხვედრაზე ავღანეთის ფინანსთა მინისტრმა იქლილჰაკიმიმ საქართველოს ბიზნესის წარმომადგენლების წინაშე ავღანეთის ეკონომიკური მდგომარეობა მიმოიხილა და იმ სექტორებზე გაამახვილა ყურადღება, სადაც შესაძლებელია ნაყოფიერი თანამშრომლობა ქართულ ბიზნესთან. მათ შორის, საუბარი წარიმართა ენერგეტიკაზე, სამშენებლო სექტორზე, სატრანსპორტო გადაზიდვებზე და სხვ. მან ისაუბრა იმ შესაძლებლობებზე, რომლებიც არსებობს ავღანეთში ქართული კომპანიებისთვის, მათ შორის, როგორ შეუძლიათ მათ მიიღონ მონაწილეობა როგორც სახელმწიფო შესყიდვებსა და ტენდერებში, აგრეთვე იმ სამშენებლო პროექტებში, რაც ავღანეთში ხორციელდება.
მინისტრმა ერთერთ პრიორიტეტულ მიმართულებად დაასახელა „ლაპის ლაზულის“ მარშრუტი, რომელიც გააერთიანებს ავღანეთის, თურქმენეთის, აზერბაიჯანის, საქართველოსა და თურქეთის სატრანსპორტო ინფრასტრუქტურას და მიმართული იქნება ტვირთბრუნვის გაზრდაზე აღნიშნული მარშრუტის გამოყენებით ევროპასა და აზიას შორის.
ავღანეთის ფინანსთა მინისტრი აგრეთვე გამოვიდა ინიციატივით, საქართველოსა და ავღანეთს შორის ერთობლივი ბიზნეს-საბჭო ჩამოყალიბდეს, რომელიც ორივე ქვეყნის საქმიანი წრეების წარმომადგენლებს კავშირების დამყარებასა და შემდგომ განვითარებაში დაეხმარება.