უმსხვილესი იაპონური კომპანიების ასოციაციის, “The Overseas Construction Association of Japan”-ის გენერალური ასამბლეის ფარგლებში გამართულ ღონისძიებაზე მოწვეულ სტუმრებს საქართველოს ელჩმა იაპონიაში ლევან ცინცაძემ საქართველოს ეკონომიკური და ტურისტული პოტენციალის, საინვესტიციო კლიმატის, ხელსაყრელი ბიზნეს გარემოს და ისტორიული კულტურის შესახებ სიტყვით მიმართა.

ელჩმა ხაზი გაუსვა ქვეყნის მნიშვნელოვან სტრატეგიულ გეოპოლიტიკურ მდებარეობას, რაც მას მომსახურებისა და ლოჯისტიკის თვალსაზრისით რეგიონული ჰაბის როლს ანიჭებს. ელჩმა ისაუბრა საქართველოში არსებული ლიბერალური საგადასახადო სისტემის, მეზობელ ქვეყნებთან, ევროკავშირთან და ჩინეთთან თავისუფალი ვაჭრობის ხელშეკრულებების მნიშვნელობაზე. ლევან ცინცაძემ ხაზი გაუსვა საქართველოს ამბიციურ გეგმებს ინფასტრუქტურული პროექტების მხრივ, რაც გზების, გვირაბების, ახალი პორტისა და სარკინიგზო გზების მშენებლობას გულისხმობს. ელჩმა აღნიშნა საერთაშორისო რეიტინგებში საქართველოს წამყვანი პოზიციები, მათ შორის ხაზი გაუსვა, რომ საერთაშორისო ინსტიტუტის რეიტინგების მიხედვით, საქართველო მსოფლიოში ყველაზე უსაფრთხო ქვეყნების ათეულში შედის. ელჩმა მადლობა გადაუხადა ასოციაციის წევრ კომპანიებს საქართველოში გაწეული საქმიანობისათვის და საქართველოში მიმდინარე და სამომავლოდ დაგეგმილ ინფრასტრუქტურულ პროექტებში კიდევ უფრო მჭიდრო თანამშრომლობის იმედი გამოთქვა.

ღონისძიებაზე, რომელსაც მსხვილი იაპონური კორპორაციებისა და იაპონიაში აკრედიტებული დიპლომატიური კორპუსის წარმომადგენლები ესწრებოდნენ მოწვეულ სტუმრებს სიტყვით ასევე მიმართეს “The Overseas Construction Association of Japan”-ის პრეზიდენტმა ტორუ შირაიშიმ და იაპონიის მიწის, ინფრასტრუქტურის, ტრანსპორტისა და ტურიზმის სახელმწიფო მინისტრმა შინსუკე სუემაცუმ.