სოფლის მეურნეობის მინისტრის პირველი მოადგილე, ნოდარ კერესელიძე ამერიკის შეერთებული შტატების სოფლის მეურნეობის დეპარტამენტის (USDA) სავაჭრო განყოფილების უფროსს, თრეისი ნეველს შეხვდა.

სოფლის მეურნეობის სამინისტროს პრესსამსახურის ინფორმაციით, შეხვედრაზე მხარეებმა ქვეყნებს შორის აგრარული მიმართულებით სამომავლო თანამშრომლობის საკითხები განიხილეს.

ნოდარ კერესელიძემ საქართველოში სოფლის მეურნეობის მიმართულებით განხორციელებული პროექტების მნიშვნელობაზე და მიღწეულ შედეგებზე ისაუბრა.

როგორც კერესელიძემ აღნიშნა, საერთაშორისო დონორი ორგანიზაციების, მათ შორის, ამერიკის შეერთებული შტატების სოფლის მეურნეობის დეპარტამენტის (USDA) და ამერიკის შეერთებული შტატების საერთაშორისო განვითარების სააგენტოს (USAID) მხარდაჭერა და მათი ჩართულობა დარგის განვითარების ხელშეწყობაში ერთ-ერთი გადამწყვეტი ფაქტორია.

შეხვედრაზე ასევე, ყურადღება საქართველოში სოფლის მეურნეობის დარგის იმ მიმართულებებზე გამახვილდა, სადაც საქართველოსა და ამერიკის შეერთებულ შტატებს შორის თანამშრომლობის სამომავლო პერსპექტივა არსებობს და სადაც ხელშეწყობის აუცილებლობის საკითხი დგას.

უწყების ცნობითვე, შეხვედრას აშშ-ს საერთაშორისო განვითარების სააგენტოს (USAID) რეგიონული დირექტორის მოადგილე შამენა გალი, აშშ-ის სოფლის მეურნეობის დეპარტამენტის (USDA) საქართველოს ოფისის წარმომადგენელი დემნა ძირკვაძე და სოფლის მეურნეობის სამინისტროს საერთაშორისო ურთიერთობების დეპარტამენტის უფროსი ხატია წილოსანი ესწრებოდნენ.