საერთაშორისო სავალუტო ფონდის მისიის ხელმძღვანელის, მერსედეს ვერა მარტინის განცხადებით, საერთაშორისო სავალუტო ფონდის მისიამ და საქართველოს ხელისუფლებამ 3-წლიანი პროგრამის დაწყების თაობაზე შეთანხმებას მიაღწია.
მისივე თქმით, სსფ-ს აღმასრულებელ დირექტორთა საბჭო საქართველოს საკითხს აპრილის შუა რიცხვებში განიხილავს.
„მაქვს პატივი განვაცხადო, რომ საერთაშორისო სავალუტო ფონდის მისიამ და საქართველოს ხელისუფლებამ მივაღწიეთ შეთანხმებას 3-წლიანი პროგრამის დაწყების თაობაზე, რომელიც ითვალისწინებს საქართველოსთვის 201.4 მილიონი SDR-ის, (დაახლოებით 285 მილიონი აშშ დოლარი) გამოყოფას „გაფართოებული დაფინანსების მექანიზმის“ (EFF) ფარგლებში“ - განაცხადა მერსედეს ვერა მარტინმა.
მერსედეს ვერა მარტინის თქმით, ხელისუფლებასთან შეთანხმებული ეკონომიკური პოლიტიკა მიზნად ისახავს მაკროეკონომიკური და ფინანსური სტაბილურობის შენარჩუნებას და სტრუქტურული ხარვეზების აღმოფხვრას, რაც სწრაფ ინკლუზიურ ეკონომიკურ ზრდას წაახალისებს.
მისივე განცხადებით, მაკროეკონომიკური სტაბილურობის უზრუნველსაყოფად და ამბიციური რეფორმების გასატარებლად საქართველოს ხელისუფლება შესაბამის ნაბიჯებს დგამს.
„საშუალოვადიან პერიოდში უნდა განხორციელდეს ფისკალური კონსოლიდაცია, რომლის ფარგლებშიც არ შეფერხდება სახელმწიფო ინვესტიციები და სოციალური ხარჯები, ხოლო ქვეყნის ვალი შენარჩუნდება მდგრად დონეზე. 2017 წლის ბიუჯეტში გათვალისწინებული მკაცრი ფისკალური ზომები ზემოაღნიშნული მიზნის მიღწევას ემსახურება. მთავრობა განახორციელებს მნიშვნელოვან ფისკალურ რეფორმებს საბიუჯეტო დისციპლინის შესანარჩუნებლად, ფისკალური წესების არსებული საზღვრების დაცვით,“ - განაცხადა ფონდის მისიის ხელმძღვანელმა.
მისი თქმით, სსფ-ს მისია და საქართველოს ხელისუფლება შეთანხმდა საჯარო ფინანსების მართვის გამკაცრების მნიშვნელობაზე. კერძოდ - უნდა გაუმჯობესდეს ფისკალური რისკების გასაჯაროება და კონტროლი, გაგრძელდეს საგადასახადო სამსახურის გაძლიერება.