წინასწარი მონაცემებით, საქართველოში პირდაპირი უცხოური ინვესტიციების მოცულობამ 2012 წლის I კვარტალში 269 მლნ აშშ დოლარი შეადგინა.

ამის შესახებ საქართველოს ეროვნული საინვესტიციო სააგენტოს დირექტორმა ქეთევან ბოჭორიშვილმა და სტატისტიკის ეროვნული სამსახურის უფროსმა ზაზა ჭელიძემ დღეს მედიასთან შეხვედრაზე განაცხადეს, სადაც მათ 2012 წლის I კვარტალში
პირდაპირი უცხოური ინვესტიციების მოცულობა შეაჯამეს.

ჭელიძის თქმით, მიმდინარე წლის I კვარტალში შემოსული ინვესტიციების მაჩვენებელი 2010 წლის შესაბამისი კვარტლის მონაცემებს 62%-ით, ხოლო 2011 წლის I კვარტლისას - 55%-ით აღემატება.

სამ უმსხვილეს ინვესტორ ქვეყანას წარმოადგენს გერმანია (49%), თურქეთი (12%) და გაერთიანებული სამეფო (10%). საქართველოში აღნიშნულ პერიოდში 61 ქვეყნიდან შემოვიდა ინვესტიციები. 2010 წლის I კვარტალში ინვესტორი ქვეყნების რაოდენობა შეადგენდა 53-ს, ხოლო 2011 წლის შესაბამის პერიოდში - 56-ს.

რაც შეეხება ინვესტორებისთვის მიმზიდველ სექტორებს, ყველაზე მეტი ინვესტიცია განხორციელდა დამამუშავებელ მრეწველობაში (64.5 მილიონი აშშ დოლარი), საფინანსო სექტორში (62.5 მილიონი აშშ დოლარი), ასევე ტრანსპორტისა და კავშირგაბულობის სექტორებში (38.1 მილიონი აშშ დოლარი).

წლის დასაწყისში საკმაოდ მაღალია რეინვესტირების წილიც, რაც ეროვნული საინვესტიციო სააგენტოს დირექტორის თქმით, იმის მაჩვენებელია, რომ უცხოელი ინვესტორებისთვის საქართველოში გრძელვადიანი ბიზნესის კეთება მომგებიანია. ბოჭორიშვილი მიიჩნევს, რომ ყოველივე ეს პოზიტიურად აისახება არა მხოლოდ, ზოგადად, საქართველოს ეკონომიკის განვითარებაზე, არამედ ხელს უწყობს ახალი ბიზნესებისა და ახალი სამუშაო ადგილების შექმნას და ქვეყანაში ცხოვრების ხარისხს გაუმჯობესებას.