სს "მადნეული" და შპს "კვარციტი" კომპანია "კაპიტალ ჯგუფმა" შეიძინა, რომლის აქციონერები რუსი ბიზნესმენები - დიმიტრი კორჟევი და დიმიტრი ტროიცკი არიან.

ამის შესახებ განცხადება "მადნეულმა" და "კვარციტმა" დღეს გაავრცელებულა.

„კაპიტალ ჯგუფის“ მფლობელობაში კომპანია NevaRus-ი შედის, რომელიც სომხურ სამთო-მომპოვებელ ბიზნესში საქმიანობს. 2011 წლის ოქტომბერსა და 2012 წლის თებერვალში საჯარო აუქციონში მონაწილეობის შედეგად, ჯგუფმა სასარგებლო წიაღისეულის მოპოვების ლიცენზიები 204 მლნ ლარად შეიძინა.

2012 წლის 14 ივნისს სს "მადნეულის" და შპს "კვარციტის" გენერალურ დირექტორად დაინიშნა ვახტანგ ფარესიშვილი.

განცხადებაში აღნიშნულია, რომ გეოლოგიურ საძიებო სამუშაოებზე 10 მლნ აშშ დოლარის ინვესტიცია უკვე განხორციელებულია, რაც ითვალისწინებს საძიებო სამუშაოების შესაძლო მოკლე ვადაში დასრულებას, მარაგების დამტკიცებას, წიაღისეული რესურსების მარაგების გაზრდასა და ათვისების ფაზაზე გადასვლას. ასევე, იგეგმება დამატებითი ინვესტიციების განხორციელებაც, რაც მანქანა-დანადგარების გადაიარაღებას, ინფრასტრუქტურის გაუმჯობესობება-მოწყობას და საქართველოში სამთო ინდუსტრიის განვითარებას მოხმარდება.

„კომპანიაში მიმდინარე რეორგანიზაციის პროცესის მიუხედავად, სს „მადნეული" და შპს „კვარციტი" სამუშაო ადგილების შენარჩუნებას უზრუნველყოფს. ქართული მადნისა და ოქროს წარმოება-გადამუშავებაზე ორივე კომპანიაში დასაქმებულია დაახლოებით 2000 ადამიანი", - ნათქვამია განცხადებაში.