სახელმწიფოს მიზეზით დაზარალებულ მეანაბრეთა საკომპენსაციო ფონდი ხელისუფლებას ზარალის ანაზღაურების ექსკლუზიურ პროექტს სთავაზობს და მის განსახორციელებლად შესაბამისი საკანონმდებლო ბაზის შექმნას სთხოვს.

ფონდის დამფუძნებლებმა დღეს პრესკონფერენციაზე პროექტის თაობაზე ისაუბრეს. როგორც ფონდის თავმჯდომარემ მალხაზ ცისკარიშვილმა განმარტა, ფონდმა უნიკალური პროექტი შეიმუშავა რომლის მიხედვით, მეანაბრეთა ზარალის ანაზღაურება ისე უნდა მოხდეს, რომ სახელმწიფო ბიუჯეტს ტვირთად არ დააწვეს.

მისი თქმით, ეს პროცესი რამდენიმე ეტაპს მოიცავს, უპირველესად სახელმწიფომ ზარალი უნდა აღიაროს, შემდეგ უნდა დადგინდეს დაზარალებულ მეანაბრეთა რეალური რაოდენობა და მოხდეს მათი ინდექსაცია, ხოლო ბოლოს, კონკრეტული მეანაბრის მიერ დაკარგული თანხის ოდენობა მოქმედ ვალუტაში უნდა განისაზღვროს.

„სახელმწიფომ დაზარალებულებს უნდა მისცეს თამასუქი ანუ ფასიანი ქაღალდი. ამის შემდეგ, უნდა მიიღოს კანონი, რათა თამასუქს მოქმედების ძალა მიეცეს. მეანაბრეს თამასუქის გაყიდვის უფლება ექნება. ის შეიძლება იყიდოს მეწარმემ, რომელიც გადასახადს, მაგალითად, ქონებისა და მოგების ამ ფასიანი ქაღალდით გადაიხდის“ - განაცხადა ცისკარიშვილმა და აღნიშნა, რომ თამასუქით სარგებლობას თავად მეანაბრეც შეძლებს, თუ ის სამეწარმეო საქმიანობას დაიწყებს.

იდეის ავტორთა განაცხადებით, პროექტი უნიკალურია, მსოფლიოში ანალოგი არ აქვს და ის საქართველოს საპატენტო უწყებაში დააპატენტეს.

ფონდის აღმასრულებელი დირექტორის თამაზ ვაშაკიძის განცხადებით, პროექტის შესახებ პრეზიდენტს და პარლამენტის სპიკერს აცნობეს, თუმცა, მისივე განცხადებით, ამ დრომდე იდეით არავინ დაინტერესებულა.

ვაშაკიძის განმარტებით, პროექტი გააცნეს ეკონომიკის სამინისტროს, რომელიც მას გარკვეული რისკების შემცველს უწოდებს.