ყაზახური ავიაკომპანია Air Astana ალმაათი-თბილისის მიმართულებით კვირაში ოთხჯერ იფრენს.
როგორც „ნიუსპრესს“ „ტავ ჯორჯიადან“ აცნობეს,  ამ თემაზე ავიაკომპანიის წარმომადგენლები დღეს თბილისის საერთაშორისო აეროპორტში ისაუბრებენ.
აეროპორტის ინფორმაციით, ალმაათი-თბილისი-ალმაათის რეისი ყოველ სამშაბათს, 97 ადგილიანი, „ემბრაერ 190“-ის ტიპის თვითმფრინავით შესრულდება. „ეკონომ კლასის“ ორი გზის ბილეთის ფასი 266 ევროდან დაიწყება. ფრენის ხანგრძლივობა 3 საათსა და 35 წუთს შეადგენს.
ავიაკომპანია Air Astana-მ თბილისის მიმართულებით პირდაპირი რეისების განხორციელება 2011 წლის 2 ივნისიდან დაიწყო და თავდაპირველად, კვირაში 3-ჯერ - ორშაბათს, ხუთშაბათს და შაბათს დაფრინავდა. 1 წლის განმავლობაში ავიაკომპანია 20 000-მდე მგზავრს მოემსახურა.