წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2012 წლის I კვარტალში 269

მლნ აშშ დოლარი შეადგინა, რაც 62 პროცენტით აღემატება 2010 წლის I კვარტალის დაზუსტებულ, ხოლო 55 პროცენტით - 2011 წლის შესაბამისი პერიოდის წინასწარ მონაცემს.

ამის შესახებ ინფორმაციას სტატისტიკის ეროვნული სამსახური ავრცელებს.

2012 წლის I კვარტალში პირდაპირი უცხოური ინვესტიციები საქართველოში 61 ქვეყნიდან განხორციელდა. აღნიშნულმა მაჩვენებელმა 2011 წლის ანალოგიურ პერიოდში 56, ხოლო 2010 წლის I კვარტალში 53 ქვეყანა შეადგინა.

2012 წლის I კვარტალში საქართველოში განხორციელებული პირდაპირი უცხოური ინვესტიციების მიხედვით უმსხვილესი ინვესტორი ქვეყნები ასე განაწილდა - პირველ ადგილზეა გერმანია 131.1 მლნ აშშ დოლარით, მეორე ადგილი თურქეთმა დაიკავა, რომელმაც საქართველოში 32.2 მლნ აშშ დოლარის ინვესტიცია განახორციელა, ხოლო მესამე ადგილზეა გაერთიანებული სამეფო 27.3 აშშ დოლარით.

უმსხვილესი ინვესტორი ქვეყნების წილმა 2012 წლის I კვარტალში მთლიანი ინვესტიციების 94 პროცენტი შეადგინა. პირველ ადგილზე გერმანია იმყოფება 49 პროცენტით, მეორეზე - თურქეთი 12 პროცენტით, მესამეზე - გაერთიანებული სამეფო 10 პროცენტით, მომდევნო პოზიციებს ვირჯინის კუნძულები და იაპონია იკავებს 8-8 პროცენტით და ლუქსემბურგი - 7 პროცენტით.

2012 წლის I კვარტალში ყველაზე მეტი პირდაპირი უცხოური ინვესტიცია დამამუშავებელი მრეწველობის სექტორში განხორციელდა და 64 მლნ აშშ დოლარი შეადგინა. მას მოჰყვება საფინანსო სექტორი, ტრანსპორტი და კავშირგაბმულობა, უძრავი ქონება, სამთომოპოვებითი მრეწველობა და ენერგეტიკა.

2011–2012 წლების კვარტალური მონაცემები წინასწარია და ექვემდებარება დაზუსტებას შესაბამისი პერიოდის წლიური სტატისტიკური გამოკვლევის მასალების დამუშავების შემდეგ.