შემოსავლების სამსახურის წარმომადგენლები მეწარმეებთან შეხვედრებს იწყებენ, რომლის მიზანი მათთვის შემოსავლების სამსახურში დანერგილი  სიახლეების გაცნობაა.
პირველი ასეთი შეხვედრა დღეს სასტუმრო ,,შერატონ მეტეხი პალასში“ მიმდინარეობს.
როგორც შემოსავლების სამსახურის უფროსის მოადგილემ ლილი ბეგიაშვილმა განაცხადა, შეხვედრის მონაწილეები პირადად შემოსავლების სამსახურის წარმომადგენლებისგან მოისმენენ იმ სიახლეების შესახებ, რომელიც ბიზნესის ხელშეწყობისა და განვითარების მიზნით ხორციელდება.
შეხვედრაზე შემოსავლების სამსახურის თანამშრომლები გადამხდელებისთვის საინტერესო თემებზე პრეზენტაციებს გამართავენ. ამის შემდეგ კი, დიალოგი კითხვა-პასუხის რეჟიმში წარიმართება.
მეწარმეებს შესაძლებლობა მიეცემათ, შემოსავლების სამსახურის წარმომადგენლებს მათ წინაშე წარმოქნილი პრობლემები გააცნონ.
,,ამ შეხვედრების მთავარი მიზანი ყველა კერძო კომპანიასა და ინდივიდუალურ მეწარმესთან უშუალო და სისტემატური კონტაქტის დამყარებაა, რათა გადაწყვეტილებები ბიზნესის წარმომადგენლებთან შეთანხმებით, მათი სურვილებისა და შენიშვნების გათვალისწინებით მივიღოთ“ - განაცხადა ბეგიაშვილმა.
მისივე თქმით, მეწარმეებთან შეხვედრები პერმანენტულ ხასიათს მიიღებს, ხოლო უკვე 15 ივნისიდან მეწარმეებს შესაძლებლობა ექნებათ www.rs.ge-ს საშუალებით ,,ფორუმზე“ დარეგისტრირდნენ, აირჩიონ მათთვის სასურველი თემა და შემოსავლების სამსახურში დანერგილ სიახლეებს უკეთ გაეცნონ.
,,ფორუმით“ გადამხდელებს საშუალება მიეცემათ, შემოსავლების სამსახურს საკუთარი მოსაზრებები გაუზიარონ, დასვან კითხვები, რაზეც მყისიერ პასუხებს მიიღებენ.