ოთხი არსამთავრობო ორგანიზაცია - „ახალგაზრდა იურისტთა ასოციაცია“, „საერთაშორისო გამჭვირვალობა - საქართველო“, „ეკონომიკური პოლიტიკის კვლევის ცენტრი“ და ასოციაცია „მწვანე ალტერნატივა“ ქვეყანაში ბიზნესის განვითარების ხელისშემშლელ ფაქტორებს გამოიკვლევენ.
ამ მიზნით მათ კოალიცია - „თავისუფალი ბიზნესისთვის“ შექმნეს, რომლის პრეზენტაციაც დღეს სასტუმრო „თბილისი მარიოტში“ გაიმართა.
ორგანიზაციის წარმომადგენელთა განმარტებით, მიუხედავად იმისა, რომ საქართველოში ეკონომიკური რეფორმები გატარდა და ქვედა დონეზე კორუფცია აღმოიფხვრა, ელიტური კორუფციისა და ბიზნესის თავისუფლების მხრივ გარკვეული ხარვეზები კვლავ არსებობს. არასამთავრობო ორგანიზაციები ერთობლივ მონიტორინგს სწორედ აღნიშნულ საკითხებზე განახორციელებენ და კვლევის შედეგებს საზოგადოებას გააცნობენ.
„საერთაშორისო გამჭვირვალობა - საქართველო“ პროექტის ფარგლებში შეისწავლის ვინ ფლობს საქართველოში მსხვილ ბიზნესს და როგორია ქვეყნის საინვესტიციო გარემო. საია კერძო ფონდებით, თბილისში გარე ვაჭრობით, თანამდებობის პირების ბიზნესში მონაწილეობით და მედიაბიზნესით დაინტერესება. „მწვანე ალტერნატივა“ ბუნებრივი რესურსების ბოროტად გამოყენების ფაქტებს გაარკვევს, ხოლო „ეკონომიკური კვლევის ცენტრი“ საგადასახადო კანონმდებლობას გაუწევს მონიტორინგს.
ოთხივე არასამთავრობო ორგანიზაცია კვლევის შედეგებს შეაჯამებს. მათ პრეზენტაციას კი, ეტაპობრივად, თვეში ერთხელ მოაწყობს. ისინი შედეგებს დიპლომატიურ კორპუსს, ბიზნეს წრეებისა და ხელისუფლების წარმომადგენლებს გააცნობენ.
აღნიშნული ორგანიზაციების წარმომადგენელთა განმარტებით, მიუხედავად იმისა, რომ ხშირ შემთხვევაში რეკომენდაციების უმეტესობას ხელისუფლება არ ითვალისწინებს, მათ მაინც გარკვეული შედეგები მოაქვთ.
როგორც ახალგაზრდა იურისტთა ასოციაციის თავმჯდომარემ თამარ ჩუგოშვილმა განაცხადა, კვლევების განხორციელებისას ძირითადი პრობლემა მათ სახელმწიფო სტრუქტურებიდან საჯარო ინფორმაციის მოპოვებისას ექმნებათ, თუმცა, მისივე განცხადებით, მიუხედავად სირთულეებისა, კვლევებისას მხოლოდ ოფიციალურ ინფორმაციას დაეყრდნობიან.
პროექტი დეკემბრის ბოლომდე გაგრძელდება. ის ფონდ „ღია საზოგადოება საქართველოს“ ინიციატივითა და მხარდაჭერით ხორციელდება.