მობილური ოპერატორი კომპანია „ბილაინი“ და გლდანის მცირე საოჯახო ტიპის ბავშვთა სახლი აქციას - „ნათელი ფერები ბავშვებს” გამართავენ.  
14 მაისიდან 14 ივნისის ჩათვლით, „ბილაინის“ ნებისმიერი აბონენტი, რომელიც „ბილაინისგან“ მობილურ ტელეფონს ან სასტარტო პაკეტს კომპანიის აბონენტთა მომსახურების ახლადგახსნილ ოფისში შეიძენს, საქველმოქმედო აქციის მონაწილე გახდება.
მობილური ტელეფონის ღირებულებიდან 1 ლარი, ხოლო ნებისმიერი სასტარტო პაკეტიდან 50 თეთრი მცირე საოჯახო ტიპის ბავშვთა სახლს გადაერიცხება. თანხა მათთვის საყოფაცხოვრებო დანიშნულების ნივთების შეძენას მოხმარდება.
„ბილაინის“ გენერალური დირექტორის სერგეი ზაკურაევის განცხადებით, „ნათელი ფერები ბავშვებს” ერთჯერადი ღონისძიება არ არის. ერთი წელია, კომპანიის ყველა ოფისი მზრუნველობამოკლებული ადამიანების დახმარებისკენ მიმართული აქტივობებით იხსნება. ამ პერიოდში კომპანა დაეხმარა თბილისში, სვანეთსა და გურიაში არსებულ ბავშვთა სახლებს.