ლაზიკაში საქართველოს სახელმწიფოს იურისდიქცია გავრცელდება, თუმცა, ქალაქს მმართველობის განსხვავებული  ფორმა და სამოქალაქო დავების განხილვის განსაკუთრებული იურისდიქცია ექნება.

ქალაქ ლაზიკის განსაკუთრებული სტატუსის ეს განმარტება საქართველოს პრეზიდენტმა მიხეილ სააკაშვილმა დღეს, ბათუმში გაერო-ს მსოფლიო ტურიზმის საერთაშორისო ორგანიზაციის შეხვედრაზე სიტყვით გამოსვლისას გააკეთა.

„ჩვენთვის სტრატეგიული საკითხია, რომ ლაზიკას, რომელიც ოკუპირებული აფხაზეთიდან რამდენიმე კილომეტრში, შავი ზღვის ყველაზე ღრმა კანიონთან მდებარეობს, რომელსაც უზარმაზარი ტერიტორია და კარგი კლიმატი აქვს, ახლოსაა რკინიგზასთან და საერთაშორისო აეროპორტთან, ახალი სტატუსი მიეცეს“-აღნიშნა მან.

პრეზიდენტის განმარტებით, მთავრობამ ქალაქისთვის ახალი საკონსტიტუციო სტატუსის მიცემა აზიისა და ცენტრალური ამერიკის ქვეყნების მაგალითების შესწავლის შემდეგ გადაწყვიტა.

მისი თქმით, ლაზიკა უპირველეს ყოვლისა ეკონომიკური პროექტია და ის მხარის განვითარების ლოკომოტივად და საქართველოს პორტების დამატებით ლოჯისტიკურ ბაზად უნდა იქცეს.

„ამ ქალაქის პროექტი ჩემი ფანტაზია არ არის. ის იმ ფაქტს ეფუძნება, რომ ყველაზე მოკლე სავაჭრო გზა ჩინეთიდან და შუა აზიიდან ევროპაში საქართველოს, შემდეგ კი, რუმინეთის და ბულგარეთის პორტებზე გადის“-აღნიშნა პრეზიდენტმა.

საქართველოს პარლამენტში კონსტიტუციაში შესატანი ცვლილებები განიხილება, რომლის თანახმად, ლაზიკას განსაკუთრებული სტატუსი მიენიჭება.