ეროვნული ბანკი სესხების გამცემი ორგანიზაციებისთვის ახალ წესებს ადგენს. ამის შესახებ ცვლილება "ეროვნული ბანკის შესახებ" ორგანულ კანონში შედის.
კანონპროექტით შემოდის საფინანსო სექტორის წარმომადგენლის ახალი ინსტიტუტი - კვალიფიციური საკრედიტო ინსტიტუტი, რომელსაც ეროვნული ბანკი გააკონტროლებს.
კვალიფიციური საკრედიტო ინსტიტუტი არის იურიდიული პირი, რომელიც სახსრებს 400–ზე მეტი ფიზიკური პირისაგან მოიზიდავს ან რომლის მიერ ფიზიკური პირებისაგან მოზიდული სახსრების ოდენობა აღემატება ხუთ მილიონ ლარს. ეროვნული ბანკის მოთხოვნის შემთხვევაში, ასეთი პირი ვალდებული იქნება დარეგისტრირდეს და ეროვნული ბანკის მიერ მისთვის დადგენილი მოთხოვნები დააკმაყოფილოს.
იურიდიული პირები, რომელთა მიერ მოზიდული სახსრები არ აღემატება 5 მლნ ლარს ან სახსრების მოზიდვა ხორციელდება ოთხასზე ნაკლები ფიზიკური პირისაგან, გარკვეულ შემთხვევებში მაინც ვალდებულნი იქნებიან ეროვნულ ბანკში რეგისტრაცია გაიარონ.
პროექტის თანახმად, ეროვნულ ბანკს შეეძლება კვალიფიციური საკრედიტო ინსტიტუტების რეგისტრაცია და რეგისტრაციის გაუქმება, მათთვის შესაფერისობის კრიტერიუმების, რისკების გამჟღავნების, მინიმალური კაპიტალის, ლიკვიდობის და დამატებითი მოთხოვნების დადგენა, შემოწმება, შეზღუდვებისა და სანქციების დაწესება.
იმ შემთხვევაში, თუ კვალიფიციური საკრედიტო ინსტიტუტის მიერ მოზიდული სახსრები აღემატება ეროვნული ბანკის მიერ დადგენილ ლიმიტს, მაშინ ეროვნულ ბანკს შეეძლება მას საბანკო საქმიანობის ლიცენზიის აღება მოსთხოვოს.
კვალიფიციური საკრედიტო ინსტიტუტის ეროვნულ ბანკში რეგისტრაციის პირობები, კვალიფიციური საკრედიტო ინსტიტუტისადმი მინიმალური კაპიტალის, ლიკვიდობის და დამატებითი მოთხოვნები, შესაფერისობის კრიტერიუმები, ფულადი ჯარიმის ოდენობა და დაკისრების წესი განისაზღვრება ეროვნული ბანკის ნორმატიული აქტით. ფულადი ჯარიმის თანხა კი, საქართველოს სახელმწიფო ბიუჯეტში მიიმართება.
საზედამხედველო ფუნქციების განხორციელებისთვის ეროვნული ბანკი უფლებამოსილი იქნება კვალიფიციური საკრედიტო ინსტიტუტებისაგან მოითხოვოს და მიიღოს ნებისმიერი ინფორმაცია (მათ შორის, კონფიდენციალური) საკუთარი კომპეტენციის ფარგლებში. თუ ასეთი სუბიექტი ეროვნული ბანკის მოთხოვნებს არ დააკმაყოფილებს, ის ლიკვიდაციით და 150 000 ლარის ოდენობის თანხით დაჯარიმდება.
კანონპროექტის ავტორები და ინიციატორები დეპუტატები პავლე კუბლაშვილი, კახა ანჯაფარიძე და ზვიად კუკავა არიან. კანონპროექტის განხილვა პარლამენტს ჯერ არ დაუწყია.