„ვისოლ ჯგუფის“ შვილობილი კომპანია „ვისოლ ავტო ექსპრესი“ ფოთსა და ბათუმში შემომავალ ტრანზიტულ გემებს, ფრანგული კომპანია „ტოტალის“ ზეთებს მიაწვდის.

„ვისოლ ბუნკირება უკვე რამდენიმე წელია საქართველოს პორტებში შემომავალ გემებს უმაღლესი ხარისხის საწვავით უზრუნველყოფს. ბოლო დროს ფოთსა და ბათუმში შემომავალი საერთაშორისო გემების მფლობელების მოთხოვნაც მაღალი ხარისხის ზეთებზეც გაჩნდა. შესაბამისად, „ვისოლ ავტო ექსპრესმა“ გადაწყვიტა „ტოტალის“ ფირმის გემის ზეთების იმპორტი განახორციელოს და საქართველოს პორტები მათთვის უფრო მიმზიდველი გახადოს“ - განაცხადა „ვისოლის ავტო ექსპრესის“ დირექტორმა გურამ დაფქვიაშვილმა.

„ვისოლ ავტო ექსპრესი“ საქართველოს ბაზარზე 2011 წელს გამოჩნდა და დღეს მას ავტო მომსახურების ცენტრების ყველაზე ფართო ქსელი აქვს. კომპანიის ავტომომსახურების ცენტრები „ტოტალისა“ და „ფინას“ ფრანგული საავტომობილო ზეთების და სხვა საპოხი მასალების გარდა მომხმარებელს, „ფრამის“ საავტომობილო ფილტრებს, საბურავებს და ვულკანიზაციისა და ბალანსირების სრულ მომსახურებისაც სთავაზობს.