საქართველოს კომუნიკაციების ეროვნულმა კომისიამ „ჯეოსელი“ 5 ათასი ლარით დააჯარიმა.
როგორც „ნიუსპრესს“ კომისიდან აცნობეს, კომპანია გარკვეულ რადიოსიხშირულ სპექტრს ყოველგვარი ლიცენზიისა და მინიჭების გარეშე იყენებდა, რაც მისი დაჯარიმების მიზეზი გახდა.
კომუნიკაციების ეროვნული კომისიის ინფორმაციით, რადიოსიხშირეთა მართვის დეპარტამენტის მონიტორინგის ჯგუფმა მთაწმინდაზე მდებარე „ჯეოსელის“ კუთვნილი მიმღებ-გადამცემი სადგური კომპანიის მოთხოვნის საფუძველზე შეამოწმა.
„ჯეოსელი“ კომისიას ატყობინებდა, რომ მთაწმინდის მთის ტერიტორიაზე მდებარე სადგურზე კომპანიის კუთვნილი რადიოსიხშირული სპექტრის გამოყენებისას გარკვეული პრობლემები ფიქსირდებოდა, რაც „ჯეოსელის“ საქმიანობას აფერხებდა.
კომპანიამ კომისიას პრობლემის მიზეზის დადგენა და აღმოფხვრა სთხოვა.
მონიტორინგის შედეგად კი დადგინდა, რომ „ჯეოსელის“ განცხადებაში მითითებული 7128 მჰც და 7149 მგჰ რადიოსიხშირეები კომპანიას არც ლიცენზიით და არც კომისიის გადაწყვეტილებით მინიჭებული არ ჰქონდა და აღნიშნულ რადიოსიხშირულ სპექტრს უკანონოდ იყენებდა.