თბილისის მერიის ორგანიზებით, 25-26 აპრილს ადგილობრივი ეკონომიკური განვითარების VI საერთაშორისო ფორუმი გაიმართება.
თბილისის მერიის პრესსამსახურის ცნობით, ფორუმს ევროპის, აზიისა და აფრიკის 20-ზე მეტი ქვეყნის წარმომადგენელი დაესწრება.
საერთაშორისო ფორუმის მთავარი თემაა „მომავლის ქალაქი“. სამომავლო გეგმებისა და მიმდინარე პროექტების შესახებ, ფორუმის მონაწილეები ერთმანეთს საკუთარ გამოცდილებას გაუზიარებენ და სამომავლო განვითარების მიმართულებით დაგეგმილ სხვადასხვა მნიშვნელოვან თემებზე იმსჯელებენ.
საერთაშორისო ფორუმს ექსპერტები, არასამთავრობო და სამოქალაქო სექტორის წარმომადგენლები დაესწრებიან და სხვადასხვა საკითხებზე გამართულ დისკუსიებში მიიღებენ მონაწილეობას.
ფორუმის ფარგლებში, თბილისში კაიროს, ჯუბას, ნაირობისა და ვილნიუსის მერები ჩამოვლენ.
ღონისძიების ფარგლებში, სხვადასხვა თემატური პარალელური სესიები გაიმათება, სადაც თბილისის მერიის სხვადასხვა უწყების ხელმძღვანელები უცხოელ კოლეგებსა და სტუმრებს საკუთარი საქმიანობის ანგარიშს წარუდგენენ.
ფორუმის პარალელურად, თბილისის მერი გიგი უგულავა და კაიროს მერი აბდელ კავი ხალიფა ორ ქალაქს შორის დაძმობილების შეთანხმებას მოაწერენ ხელს, რაც ქვეყნებს შორის ურთიერთობის გაღრმავებასა და მჭიდრო კავშირის დამყარებას ისახავს მიზნად.
ადგილობრივი ეკონომიკური განვითარების საერთაშორისო ფორუმს თბილისის მერია წელს მეექვსედ ატარებს.