საქართველოს პრეზიდენტი მიხეილ სააკაშვილი ქვეყანაში „ტრამპ-თაუერის“ პროექტის განხორციელებას დიდ მოვლენად მიიჩნევს.  ამის შესახებ მიხეილ სააკაშვილმა ბათუმში, პროექტის პრეზენტაციაზე განაცხადა, რომელსაც ამერიკელი მილიარდერი დონალდ ტრამპი თავადაც ესწრებოდა.

მისი თქმით, საქართველოს არ აქვს ნავთობი და გაზი და მისი მთავარი რესურსი ქართველი ხალხია.

„რა არის საქართველოს ფენომენი? პატარა ქვეყანაში, რომელიც რთულ რეგიონშია მსგავსი სასწაული შენდება და ისეთი სახელები შემოდის, როგორიც ტრამპია“ - აღნიშნა პრეზიდენტმა.

სააკაშვილმა საქართველოში კორუფციის დაბალ მაჩვენებლებზე ისაუბრა და ამის დასტურად საერთაშორისო საფინანსო კორპორაციის მიერ ახლახან ჩატარებული ბიზნესგარემოს კვლევის შედეგები მოიყვანა.

„საქართველოში არის მთავრობა, რომელიც ბიზნესს ეხმარება და ყველასთავის ერთნაირ პირობებს ქმნის. ქვეყანას აქვს სახელი, რომელიც მიუხედავად გარეშე ძალების ყველა მცდელობისა- ამ სახელს ძირი გამოუთხარონ, მთელ რეგიონში განვითარების თვალსაზრისით კაშკაშა ვარსკვლავი ხდება“- აღნიშნა მან.

პრეზიდენტმა კიდევ ერთხელ გაუსვა ხაზი საქართველოში სამშენებლო ბუმის არსებობას და აღნიშნა, რომ ბათუმი არამხოლოდ შავიზღვისპირეთის, არამედ აღმოსავლეთ ევროპის საუკეთესო ქალაქი გახდება.