საქართველოში მოსახლეობის მეხუთედი სიღარიბის ზღვარს ქვემოთ არის. დიდ ქალაქებში კი უმუშევრობა 20-30%-ს აღწევს.  ამის შესახებ პრეზიდენტმა მიხეილ სააკაშვილმა წინანდალში სასტუმრო „რედისონის“ მშენებლობის დაწყების ცერემონიაზე სიტყვით გამოსვლისას განაცხადა.
„გამოხტებიან ხოლმე აქეთ-იქიდან და იტყვიან, რომ გეყოთ ამდენი ტრაბახი, რამდენ მოქალაქეს უჭირს და შიაო. მე ეს ყველაზე კარგად ვიცი. ხოლო, ვინც ტელევიზორში ყველაზე ხშირად ლაპარაკობს, იმათ საერთოდ არ უჭირთ. ვინც ყველაზე მეტს ლაყბობს, ისინი საკუთარ საბანკო ანგარიშებზე მილიონებს ითვლიან და სულ ფეხებზე ჰკიდიათ მაგალითად წინანდლის მოსახლეობის გაჭირვება“ -განაცხადა პრეზიდენტმა.
ამასთან, სააკაშვილის თქმით, მიუხედავად იმისა, რომ ბოლო წლების განმავლობაში უმუშევრობა ქვეყანაში მესამედით შემცირდა, ის მაინც მთავარ პრობლემად რჩება და გამოსავალი ეკონომიკის ყველა მიმართულებით განვითარებაა.