ფინანსთა მინისტრი დიმიტრი გვინდაძე საქართველოს საპატრიარქოს წმ. ანდრია პირველწოდებულის ქართულ უნივერსიტეტს ესტუმრა და საჯარო ლექცია წაიკითხა.
როგორც "ნიუსპრესს" ფინანსთა სამინისტროდან აცნობეს, მინისტრმა საჯარო ლექცია თემაზე - "საქართველოს ეკონომიკური განვითარება: ხედვა, სტრატეგია და პერსპექტივები" ჩაატარა, რომელსაც ეკონომიკისა და ბიზნესის მართვის, ასევე სხვა ფაკულტეტების სტუდენტები და პროფესორ-მასწავლებლები დაესწრნენ.
გვინდაძე მათ სახელმწიფო ფინანსების მართვის კუთხით მიღწეულ პროგრესზე და მიმდინარე რეფორმებზეც ესაუბრა.
სტუდენტებთან შეხვედრის დროს, მინისტრმა ფინანსთა აკადემიის მიერ ორგანიზებულ სასწავლო პროგრამებსა და სტაჟირების კონკურსებში ქართული უნივერსიტეტის სტუდენტების ჩართვის მზადყოფნა გამოთქვა.
ლექციის შემდეგ იგი უნივერსიტეტში სრულიად საქართველოს კათოლიკოს-პატრიარქის წარმომადგენელს ქორეპისკოპოს იაკობს, რექტორ სერგო ვარდოსანიძეს და აკადემიური საბჭოს წევრებს შეხვდა.
საპატრიარქოს წმიდა ანდრია პირველწოდებულის სახელობის ქართული უნივერსიტეტი სრულიად საქართველოს კათოლიკოს-პატრიარქის, უწმიდესი და უნეტარესი ილია II-ის ლოცვა-კურთხევით, 2008 წელს შეიქმნა. მასში 1000-მდე სტუდენტი სწავლობს.