ფიჭური კავშირგაბმულობის კომპანია "ჯეოსელის" მიერ ქვეყნის ეკონომიკაში შეტანილი თანხა 517 მლნ ლარს შეადგენს.
როგორც კომპანიის გენერალურმა დირექტორმა ოსმან თურანმა დღეს პრესკონფერენციაზე განაცხადა, გასული 15 წლის მანძილზე ჯეოსელმა 729 მლნ-ს ინვესტიცია განახორციელა.
თურანის თქმით, "ჯეოსელს" კომპანიაში ქვეყნის მასშტაბით 5 ათასი დასაქმებული ჰყავს.
"თელიასონერას" პრეზიდენტის ლარს ნიბერგის განცხადებით, კომპანიის სამომავლო გეგმებით უმაღლესი სტანდარტების დანერგვაა გათვალისწინებული.
მისი თქმით, რამდენიმე წელიწადში მობილური ტელეფონის საშუალებით საქართველოში ნებისმიერი მომსახურების საფასურის გადახდა იქნება შესაძლებელი. უახლოეს წლებში მეოთხე თაობის ქსელიც დაინერგება.
რაც შეეხება კომპანიის სოციალური პასუხიმგებლობის პროგრამას, ამ მიმართულებით მთავარ პრიორიტეტად შეზღუდული შესაძლებლობის მქონე პირებზე ზრუნვა, განათლების, კულტურისა და სპორტის სფეროში წვლილის შეტანა და გარემოს დაცვა სახელდება.
იუბილესთან დაკავშირებით "ჯეოსელი" ეროვნულ მუზეუმში სამი დღის განმავლობაში ნებისმიერი მსურველისთვის უფასო შესვლას უზრუნველყოფს.
"ჯეოსელის" 15 წლის იუბილეს აღსანიშნავად თბილისის დიდ საკონცერტო დარბაზში დღეს კონცერტი გაიმართება. საღამოს ფეირვერკი "იასამნისფერი ცა" დაასრულებს.