საქართველოს კომუნიკაციების ეროვნულმა კომისიამ კომერციული რეკლამის ტექსტის სტანდარტებთან შესაბამისობის დამდგენი ვებ-აპლიკაცია შექმნა.
აპლიკაცია რეკლამის დამკვეთებს, დამამზადებლებს და განმათავსებლებს საშულებას მისცემს მარტივად დაადგინონ, აკმაყოფილებს თუ არა კანონით დადგენილ პირობებს სამაუწყებლო რეკლამაში გამოყენებული ტექსტი.
რეკლამის შემქმნელები ეთერში გაშვებამდე სარეკლამო რგოლს კომისიის ოფიციალურ ვებ-გვერდზე ატვირთავენ.
ვიდეორგოლი კადრებად დაიშლება, შერჩეულ კადრზე არსებული ტექსტის ჩარჩოში ჩასმის შემდეგ დადგინდება, შეესაბამება თუ არა მისი ზომა დადგენილ სტანდარტს.
პროგრამა ასევე აღჭურვილია ტექსტის ჩვენების ხანგრძლივობის კალკულატორით, რომელიც ტექსტში გამოყენებული სიტყვების რაოდენობის შეყვანის შემდეგ, იმ მინიმალურ ხანგრძლოვობაზე მიანიშნებს, რომელიც ტექსტის საჩვენებლადაა საჭირო.
კომუნიკაციების ეროვნული კომუნიკაციის ინფორმაციით, სარეკლამო რგოლის სტანდარტის შექმნის იდეა კომისიის მიერ რეკლამაში გამოყენებული ტექსტების აღქმადობის თაობაზე არაერთი დავის განხილვამ გამოიწვია.
კომისაში აცხადებენ, რომ "ელექტრონული კომუნიკაციების სფეროში მომსახურების მიწოდების წესებისა და მომხმარებელთა უფლებების დაცვის შესახებ რეგლამენტში" დამატება შევიდა, რომლის მიხედვითაც, ელექტრონული საკომუნიკაციო მომსახურების კომერციულ რეკლამაში გამოყენებული ტექსტის სიმბოლოს სიმაღლე სატელევიზიო კადრის სიმაღლის 4%-ზე ნაკლები არ უნდა იყოს. ასევე, ტექსტის ჩვენების ხანგრძლივობა იმგვარად უნდა განისაზღვროს, რომ ტექსტის მოცულობა 1 წუთში 140 სიტყვაზე მეტის წაკითხვას არ ითხოვდეს.
კომისიის ინფორმაციით, კომერციული რეკლამის ტექსტის სტანდარტი, მომხამრებლს სარეკლამო რგოლიდან სათანადო ინფორმაციის მიღების, სარეკლამო რგოლების დამკვეთს კი, რეკლამის კანონთან შესაბამისობის მარტივად დადგენის საშუალებას აძლევს.