ფინანსთა სამინისტროში დღეს, მსოფლიო ბანკის წარმომადგენლებმა „სახელმწიფო ხარჯების ანალიზი - ხარჯების მართვა მდგრადი განვითარებისა და ეკონომიკური ზრდისთვის,“ - თემაზე სპეციალური პრეზენტაცია გამართეს.
სამინისტროს პრესსამსახურის ინფორმაციით, ანგარიშში განხილულია სახელმწიფო ხარჯების პოლიტიკასთან დაკავშირებული საკითხები და მსოფლიო ბანკის რეკომენდაციები სახელმწიფოსთვის ისეთ პრიორიტეტულ სფეროებში როგორიცაა პენსიების მატება, სოციალური დახმარება, ჯანდაცვა, ინფრასტრუქტურა, კაპიტალური ხარჯები. შეხვედრას დაესწრნენ საქართველოს ფინანსთა მინისტრი ნოდარ ხადური, ასევე ენერგეტიკის, ჯანდაცვის, განათლების, ეკონომიკის, ინფრასტრუქტურისა და სოფლის მეურნეობის სამინისტროების წარმომადგენლები.
„საქართველოში მსოფლიო ბანკი ბევრ საინტერესო პროექტს ახორციელებს, მათ შორის, ერთ-ერთი პროექტი შეეხება სახელმწიფო ხარჯების მართვის სისტემის გაუმჯობესებას. ჩვენ მოვისმინეთ ანგარიში იმის შესახებ, თუ რა მდგომარეობაა ამ კუთხით, რასაც გვირჩევენ კოლეგები მსოფლიო ბანკიდან. აღნიშნული პროექტი 6 თვის წინ დასრულდა და ბევრი მიმართულება რეალობას არ ასახავს, თუმცა ჩვენ შევთანხმდით, რომ გავაგრძელებთ თანამშრომლობას იმისთვის, რათა სახელმწიფო ხარჯები უფრო ეფექტურად და გამჭვირვალედ იხარჯებოდეს და ხელი შევუწყოთ საქართველოში ეკონომიკის ზრდას“ - განაცხადა ფინანსთა მინისტრმა ნოდარ ხადურმა.
პრეზენტაციას მსოფლიო ბანკის მხრიდან, ბანკის რეგიონული დირექტორის მოვალეობის შემსრულებელი ელენე იმნაძე და მსოფლიო ბანკის სხვა წარმომადგენლები დაესწრნენ.