ფინანსთა და შრომის, ჯანმრთელობისა და სოციალური დაცვის მინისტრებმა, დღეს მსოფლიო ჯანდაცვის ორგანიზაციისა და მსოფლიო ბანკის ექსპერტებთან გამართეს შეხვედრა.
ექსპერტები საქართველოში ორდღიანი ვიზიტით იმყოფებიან.
სამინისტროს პრესსამსახურის ინფორმაციით, სტუმრები გაეცნენ მთავრობის ახალ პროგრამას საქართველოში ჯანდაცვის სისტემის განვითარების და საყოველთაო დაზღვევის მიმართულებით. ასევე, თუ რა პრიორიტეტულ მიმართულებებს ითვალისწინებს 2013 წლის სახელმწიფო ბიუჯეტი ჯანდაცვისა და სოციალური უზრუნველყოფის კუთხით.

„საუბარი შეეხო ჯანდაცვის რეფორმის გაგრძელებას. იმ სიახლეებს, რომელიც საქართველოში იქნება მომავალ წელს ჯანდაცვის სისტემის დაფინანსების მიმართულებით. ვფიქრობ, შედგა საინტერესო და ინფორმატიული შეხვედრა. ჩვენ ვმუშაობთ ჯანდაცვის სამინისტროსთან ერთად, რათა ყველა ის ვალდებულება, რომელიც ავიღეთ შევასრულოთ და რაც მნიშვნელოვანია, მოსახლეობამ მომავალი წლიდან მიიღოს ხელმისაწვდომი და ხარისხიანი ჯანდაცვის მომსახურება“ - განაცხადა ფინანსთა მინისტრმა ნოდარ ხადურმა.

ექსპერტები საქართველოს მთავრობის წევრებთან სამუშაო შეხვედრებს ხვალაც გამართავენ.