საქართველოს სტატისტიკური სისტემის გლობალური შეფასების მიზნით, სტატისტიკის ეროვნულ სამსახურში ერთ კვირიანი ვიზიტით, საერთაშორისო მისია იმყოფება. ამ მისიის ფარგლებში, ეს უკვე რიგით მეორე ვიზიტია.
„საქსტატის“ პრესსამსახურის ინფორმაციით, მისიის შემადგენლობაში არიან როგორც საერთაშორისო ორგანიზაციების – ევროკომისიის (ევროსტატის) და გაეროს ევროპის ეკონომიკური კომისიის, ისე ევროკავშირის ცალკეული ქვეყნების სტატისტიკური უწყებების წარმომადგენლები.
მისიის მიზნებს კი, საქართველოს სტატისტიკური სისტემის ევროპული სტანდარტებისადმი შესაბამისობის დონის განსაზღვრა წარმოადგენს.
პრესსამსახურის ინფორმაციითვე, წინა მისიის შეფასების შედეგების საფუძველზე შემუშავდა მოხსენების შუალედური ვერსია, რომელშიც ჩამოყალიბებულია რეკომენდაციები, რომელთა შესრულება ხელს შეუწყობს ქვეყნის სტატისტიკური სისტემის შემდგომ განვითარებასა და ევროპულ სტანდარტებთან მის დაახლოებას.
მისიის თბილისში ყოფნის დროს, სამუშაო შეხვედრები გაიმართება სტატისტიკის ძირითად მწარმოებლებთან.