საქართველოს ფინანსთა მინისტრი ნოდარ ხადური საქართველოში ჩინეთის სახალხო რესპუბლიკის ელჩის დროებით მოვალეობის შემსრულებელს ჟენგ ვეის შეხვდა. ფინანსთა სამინისტროს პრესსამსახურის ინფორმაციით, შეხვედრა გაცნობით ხასიათს ატარებდა.

„მნიშვნელოვანია ის პერსპექტივა, რომელიც არსებობს ქართულ-ჩინურ ურთიერთობებში. ეს ეხება როგორც ქართული ექსპორტის გაძლიერებას, ისე საქართველოს სატრანზიტო ფუნქციის გამოყენებას ჩინური პროდუქციის ევროპაში მოსახვედრად. ვფიქრობ, საინტერესო შეხვედრა იყო. იმედი მაქვს, ჩვენ გავაგრძელებთ ურთიერთობებს, მით უფრო, რომ ჩინეთს აქვს გარკვეული პროექტები საქართველოსთან სხვადასხვა სექტორში, მათ შორის, სოფლის მეურნეობაში“ - განაცხადა ნოდარ ხადურმა.

ჩინეთის ელჩის მოვალეობის შემსრულებელმა იმედი გამოთქვა, რომ პარტნიორობა გაგრძელდება და უფრო მეტი ჩინური კომპანია ჩამოვა საქართველოში, ისე როგორც ჩინურ ბაზარზე შევლენ ქართული კომპანიები.