საქართველოს ახალი ფინანსთა მინისტრი ნოდარ ხადური მუშაობას შეუდგა. მან ფინანსთა მინისტრის რანგში პირველი სამუშაო შეხვედრები თანამშრომლებთან და საერთაშორისო ორგანიზაციების წარმომადგენლებთან გამართა.

სამინისტროს ახალმა ხელმძღვანელმა მოადგილეებისა და დეპარტამენტის თავმჯდომარეებისგან მოისმინა ინფორმაცია სამინისტროს სისტემაში დღეისთვის არსებული ვითარების შესახებ და იმ სიახლეებსა და რეფორმებზე ისაუბრა, რომელიც ფინანსთა სამინისტროში ახალი გუნდის მისვლის შემდეგ იგეგმება.

დღესვე, მინისტრმა გაცნობითი ხასიათის შეხვედრა გამართა სამხრეთ კავკასიის ქვეყნებში მსოფლიო ბანკის წამყვან ეკონომისტთან რაშმი შანქართან. შეხვედრა შედგა ასევე საერთაშორისო სავალუტო ფონდის მუდმივ წარმომადგენელთან საქართველოში აზიმ სადიკოვთან.

შეხვედრებზე საქართველოსთან ორმხრივი თანამშრომლობის საკითხები, ფინანსთა სამინისტროსთან ერთობლივი პროექტები და სამომავლო გეგმები განიხილეს. ფინანსთა მინისტრმა სტუმრებს ინფორმაცია მიაწოდა იმ ახალი სამთავრობო პროგრამის ძირითად პრიორიტეტებზე, რომლის განხორციელებასაც პრემიერ-მინისტრის ბიძინა ივანიშვილის ხელმძღვანელობით ქვეყნის ახალი აღმასრულებელი ხელისუფლება გეგმავს.