ფინანსთა მინისტრობის კანდიდატის ნოდარ ხადურის ინფორმაციით, ამ დროისთვის, სახელმწიფო ბიუჯეტში მხოლოდ 200 მლნ ლარია.

როგორც „ნიუსსპრესს“ ხადურმა განუცხადა, ყოფილმა პრემიერ-მინისტრმა და ყოფილმა ფინანსთა მინისტრმა კამერების წინ განცხადება გააკეთეს, რომ ახალ მთავრობას 2 მლრდ ლარს უტოვებდნენ, რომელიც სრულიად საკმარისია ყველა ვალდებულების შესარულებლად, მაგრამ ეს, მისი შეფასებით, კიდევ ერთი ტყუილია.

„ამ წუთას, ბიუჯეტში ანგარიშზე დაახლოებით 200 მლნ ლარია, რომელიც შეიძლება კიდევ შემცირდეს, რადგან ხელფასების გაცემა მიმდინარეობს. არანაირი 2 მლრდ არ არსებობს და არის მხოლოდ 200 მლნ ლარი, რომელიც ხარჯებს ხმარდება. ძველი მთავრობა ამბობს, რომ თითქოს, ბიუჯეტი გადაჭარბებით არის შესრულებული, რაც მორიგი ტყუილია, რადგან წლიური გეგმა ცხრა თვის მანძილზე მხოლოდ 75%-ით არის შესრულებული“ - განაცხადა ხადურმა.

მინისტრობის კანდიდატის მტკიცებით, საგადასახადო მუშაობას ჩვეულ რეჟიმში გააგძელებს და ყველა ის ვალდებულება შესრულდება, რომელიც 2012 წლის ბიუჯეტით იყო აღებული.