ეკონომიკის მინისტრობის კანდიდატი გიორგი კვირიკაშვილი ინვესტორების მოზიდვის შესაძლებლობას ქვეყანაში სწორი საგარეო პოლიტიკის განხორციელებაში ხედავს.

როგორც მან ტელეკომპანია „მაესტროს“ პრეს-კლუბში სტუმრობისას განაცხადა, თავისუფალი ინდუსტრიული ზონების განვითარება პერსპექტიული საკითხია, თუმცა, საქართველოს შემთხვევაში ამან შედეგი არ გამოიღო.

კვირიკაშვილი ამის მიზეზად ქვეყანაში თავისუფალი სასამართლოს, ასევე, ბიზნესისა და კერძო საკუთრების ხელშეუხებლობის უფლების არარსებობას ასახელებს.

„რომელი ბიზნესმენი გარისკავდა ამ ტიპის ქვეყანაში, თუნდაც თავისუფალ ეკონომიკურ ზონაში შემოსვლას“ - აღნიშნა მან.

ეკონომიკის მინისტრობის კანდიდატის თქმით, ყველა სფერო ერთმანეთზეა გადაჯაჭვული და კომპლექსური ეფექტი მხოლოდ ყველა არსებული პრობლემის ერთდროულად მოგვარების შედეგად მიიღწევა.

კვირიკაშვილმა იმედი გამოთქვა, რომ ახალი მინისტრთა კაბინეტი მსგავსი ეფექტის მიღწევას შეძლებს.

„ზოგადად, ჩვენს ქვეყანას აქვს ბაზრის სიმცირის პრობლემა, ამიტომ სწორი საგარეო პოლიტიკითა და სწორი სიგნალების გაგზავნით ჩვენს მეზობლებთან, უნდა მოვახერხოთ მსხვილი კომპანიების დაინტერსება, რომელიც ბაზრის სიმცირის გამო არ შემოდიან ქვეყანაში“ - განაცხადა კვირიკაშვილმა და დასძინა, რომ ქვეყნისთვის უმაღლეს პრიორიტეტად კვლავ რუსეთის ბაზრის დაბრუნება დარჩება.