საქართველოს კომუნიკაციების ეროვნულმა კომისიამ ფიქსირებული ფართოზოლოვანი ინტერნეტმომსახურების ხარისხის მონიტორინგის შესყიდვაზე ტენდერი გამოაცხადა.
როგორც კომუნიკაციების კომისიაში განმარტავენ, ფართოზოლოვანი ინტერნეტ ბაზრის კვლევის დაწყება საზოგადოებაში ინტერნეტპროვაიდერების მიმართ გაჩენილი უკმაყოფილების გამო გადაწყდა.

„კომისიის ოფიციალურ გვერდზე სოციალურ ქსელ Facebook-ში და ასევე, კომისიასთან არსებულ მომხმარებელთა უფლებების საზოგადოებრივი დამცველის სამსახურში ხშირი იყო ინეტრნეტპროვაიდერების მომსახურების ხარისხით და ამ მომსახურებისთვის დაწესებული ტარიფით უკმაყოფილო აბონენტების საჩივრები“ - აღნიშნავს კომუნიკაციების კომისია.

კვლევა ჩატარდება საქართველოს სამ მსხვილ ქალაქში - თბილისში, ბათუმსა და ქუთაისში.

მონიტორინგი ჩაუტარდებათ ინტერნეტპროვაიდერების „კავკასუს ონლაინის“, „სილქნეტის“ და „ახალი ქსელების“ აბონენტებს.

საჭიროების შემთხვევაში, შესაძლებელია მონიტორინგის პროცესში საკვლევი ქალაქების და ინტერნეტპროვაიდერების ჩამონათვალში ცვლილებები შევიდეს, რადგან პროექტის ხანგრძლივობა სამ წელზეა გათვლილი.

კომისია სამ წლიანი პროექტის ფარგლებში, ყოველ მომდევნო ეტაპზე, საზოგადოებას მიაწვდის ინფორმაციას მონიტორინგის მიმდინარეობის შესახებ.