კასპში ორი მნიშვნელოვანი პროექტის დასრულების და გახსნის ცერემონიალი გაიმართა. კასპს განათლების ორი კერა შეემატა - პროფესიული კოლეჯი და ინოვაციებისა და ტექნოლოგიების ცენტრი.
გახსნას ესწრებოდნენ საქართველოს ეკომომიკისა და მადგრადი განვითარების, განათლების, მეცნიერების, კულტურისა და სპორტის სამინისტროს, განათლების ხარისხის განვითარების, ინოვაციებისა და ტექნოლოგიების ცენტრის წარმომადგენლები. მათ კასპელ ახალგაზრდებს მუილოცეს და მოუწოდეს შეისწავლონ პროფესიები, მეტად განვითარდნენ და შეიქმნან მომავალი.

"თამამად შეგვიძლია ვთქვათ, რომ ჩვენ ერთად კასპში და ოგადად შიდა ქართლში ისტორიული პროექტები განვახორციელეთ. დღეს კასპში ტექნოპარკი და პროფესიული კოლეჯი გავხსენით. რეგიონის ახალგაზრდებს და ზოგადად მოქალაქეებს ექნებათ თავისუფალი სივრცე, რომ თავისი ნიჭი და იდეები რეალობად აქციონ და რაც მთავარია, თავისი შესაძლებლობები რეგიონის განვითარებას მოახმარონ" - აღნიშნა ირაკლი მეზურნიშვილმა კასპის მუნიციპალიტეტის მაჟორიტარმა დეპუტატმა, რომლის ძალისხმევის შედეგია დღევანდელი წარმატება.

აღნიშნული კოლეჯი საშუალებას მისცემს არა მარტო კასპელ, არამედ საქართველოში მცხოვრებ ყველა ახალგაზრდას განვითარდეს პროფესიულად.

პროფესიული სასწავლებლის მისიას წარმოადგენს თითოეული სტუდენტისათვის ხელმისაწვდომი, სრულფასოვანი და ხარისხიანი სწავლებით უზრუნველყოფა. ეს ხელს შეუწყობს კონკურენტუნარიანი კადრების მომზადებას, მათ დასაქმებას და თვითრეალიზაციას.

ტექნოპარკი წარმოადგენს ფიზიკურ სივრცეს, სადაც თავმოყრილია ტექნოლოგიური, საგანმანათლებლო და პროფესიონალური რესურსები და მიზნად ისახავს ემსახუროს საქართველოში ცოდნაზე დაფუძნებული ეკონომიკის განვითარებას. ასევე რეგიონის ახალგაზრდებს შესაძლებლობას მისცემს სახელმწიფოს მხარდაჭერით, ინოვაციური იდეები რეალურ ბიზნესად აქციონ და განავითარონ თავიანთი სტარტაპ იდეები.