"ვირუსის მართვამ და იმ შედეგებმა, რაც დღეს გვაქვს, მოგვცა შესაძლებლობა, ქვეყნის შიდა ეკონომიკას დაეწყო აღდგენის პროცესი", - განაცხადა ფინანსთა მინისტრმა ივანე მაჭავარიანმა გადაცემაში „პოლიტიკური ინტერვიუ შალვა რამიშვილთან ერთად“.

როგორც მან განმარტა, მნიშვნელოვანია ეს ვითარება გაგრძელდეს და ეკონომიკის ყველა სექტორმა დაიწყოს აღდგენის პროცესი.

„საქართველოს შიდა ეკონომიკა, რომ გამოვრიცხოთ ტურიზმი და საგარეო ფაქტორი, პრაქტიკულად, სრული აღდგენის პროცესშია. ეს რაღაც დოზით არის შემსუბუქება. რა თქმა უნდა, ეს არ არის იმაზე კარგი, ვიდრე იყო გასულ წელს, მაგრამ ბევრად უკეთესია, ვიდრე ის რომ ყოველდღიურად 400-500 ინფიცირებული გვყავდეს და 10-ჯერ ან 100-ჯერ მეტი გარდაცვლილი. დამერწმუნეთ, ეს არ არის მხოლოდ მორალის საკითხი - სიცოცხლე თუ ეკონომიკა, ეს პრაგმატულადაც ასეა. თუ ეპიდემია ვმართეთ თუ მეტი სიცოცხლე გადავარჩინეთ, ეკონომიკისთვის ეს პრაგმატულადაც გამართლებულია. მაგალითს გეტყვით, ის, რომ დღეს თავისუფლად შეგვიძლია ნებისმიერ კაფეში, მაღაზიაში შესვლა, საზოგადოებრივი ტრანსპორტით მგზავრობა, მოგზაურობა ისე, რომ უცხოელი ტურისტი არ არის, ეს მაინც დიდი შემსუბუქებაა,“ - განაცხადა ფინანსთა მინისტრმა და ისაუბრა იმ ალტერნატიულ სცენარზეც როგორ შეიძლება განვითარდეს მოვლენები, თუკი კონტროლის გარეშე გაიხსნება საზღვრები.
„ამის ალტერნატივა არის ის, რომ შემოვა უცხოელი ტურისტების რაღაც რაოდენობა, საკმაოდ მცირედი ვიდრე იყო შარშან და ეს არის მაქსიმუმ 20-25 პროცენტი და ისიც იმ ქვეყნებიდან, ვისაც ვუღებთ კარს. სამაგიეროდ, მაღალია ინფიცირება, რის გამოც ყველას აქვს თვითშეზღუდვა, აღარ მიდის იქ, სადაც მანამდე თავისუფლად შეეძლო წასვლა. ეს ისე დაარტყამდა ჩვენს ეკონომიკას, რომ პრაქტიკულად, ხელში შეგვრჩებოდა მაღალი ინფიცირება და სიკვდილიანობა და უფრო შენელებული ეკონომიკა და ამას ფაქტებიც ადასტურებს. შვედეთის მაგალითი რომ ავიღოთ, ის პერიოდი, როდესაც მეზობელმა ქვეყნებმა გამოაცხადეს კარანტინი, შვედეთმა ეს არ გააკეთა. შესაბამისად, ერთი თვის განმავლობაში მათი ეკონომიკური აქტივობა შედარებით უკეთესი იყო ვიდრე მეზობლების, მაგრამ 4-5-თვიან პერსპექტივაში, მათი ეკონომიკა ისევე დაეცა და ისეთივე დარტყმა მიიღო, როგორც ნორვეგიის ან ფინეთის, მაგრამ 10-ჯერ მეტი გარდაცვლილით. ვინც ტელევიზორს უყურებს, ვინც მსოფლიო სიახლეებს ეცნობა და ხედავს, რა ხდება ჩვენზე ბევრად განვითარებულ და მდიდარ ქვეყნებში, ნახავს რომ აქ, მეტი ოპტიმიზმის საფუძველი გვაქვს,“ - აღნიშნა ფინანსთა მინისტრმა, ივანე მაჭავარიანმა.