„ჩვენი სამინისტრო აწარმოებს შრომითი ბაზრის შესაბამის კვლევებს, რაც საშუალებას მოგვცემს, განვსაზღვროთ კონკრეტული პოლიტიკის მიმართულებები და საჭიროებები შრომის ბაზრის გაუმჯობესებისა და ადამიანური კაპიტალის განვითარების მიზნით“ - ამის შესახებ ეკონომიკისა და მდგრადი განვითარების მინისტრმა ნათია თურნავამ დონორთა ყოველწლიურ კონფერენციაზე სიტყვით გამოსვლისას განაცხადა.

მისივე თქმით, ადამიანური კაპიტალის განვითარება ერთ-ერთი მნიშვნელოვანი პრიორიტეტია.
„განათლების რეფორმების პარალელურად, შრომის ბაზრის პოლიტიკა ფოკუსირდება შრომის ბაზრის საჭიროებებზე მეტი ინფორმაციის მიწოდებაზე, შრომითი შესაბამისობის სერვისების გაღრმავებაზე, პროფესიულ განათლებაზე, სასწავლო პროგრამების განვითარებასა და შრომით ძალებში ქალების უფრო აქტიური მონაწილეობის ხელშეწყობაზე“, - აღნიშნა ნათია თურნავამ დონორთა ყოველწლიურ კონფერენციაზე გამოსვლისას.

მინისტრმა ასევე ხაზი გაუსვა, რომ მნიშვნელოვანია მეტი კოორდინაცია როგორც უწყებებს შორის, ასევე დონორ ორგანიზაციებთან, რადგან რეფორმების დღის წესრიგი ძალიან მრავლისმომცველია და მოითხოვს, ვიყოთ უფრო მიზანმიმართულები და ეფექტიანები.

დონორთა ყოველწლიური კონფერენცია ცერემონიების სასახლეში საქართველოს პრემიერ-მინისტრმა გიორგი გახარიამ გახსნა. ფორუმის ფარგლებში, ნათია თურნავამ დონორი ორგანიზაციების წარმომადგენლების შეკითხვებს უპასუხა.