პროგრამა "აწარმოე საქართველოში" მიმართულია მცირე და საშუალო ბიზნესზე და ჩვენი ამოცანაა, პროგრამას დამატებული ახალი პრიორიტეტები კიდევ უფრო მეტად ორიენტირებული გავხადოთ მეწარმეების საჭიროებებზე, - ამის შესახებ ეკონომიკისა და მდგრადი განვითარების მინისტრმა ნათია თურნავამ პარლამენტში, "მინისტრის საათის" ფორმატში გამოსვლისას განაცხადა.


მისივე თქმით, ოპონენტების მხრიდან გამოთქმული ყველა სხვა მოსაზრება კონკრეტული ფაქტების გარეშე არის პროგრამის დისკრედიტირება და მოსახლეობა შეცდომაში შეჰყავს.


"ძალიან აქტიური მიმოწერა გვაქვს ბატონ ლევან კობერიძესთან, ბევრ კითხვებს გვიგზავნის და დიდი მადლობა ამისთვის, ეს ჩვენ ფორმაში გვამყოფებს. თუმცა, უნდა აღიაროთ, რომ ჩვენც ვცდილობთ, საკმაოდ დეტალურად გიპასუხოთ. რაც შეეხება საკრედიტო-საგარანტიო სქემას - გვაქვს პროგრამები, რომლებიც არის ძალიან მოთხოვნადი და გვაქვს პროგრამები, რომლებიც ჯერჯერობით არ არის ისეთი მოთხოვნადი. მიუხედავად პირადად ჩემი დიდი ძალისხმევისა - ივლისში, ორი თვის დანიშნული მინისტრი ვიყავი, როცა ყველა ბანკი შევკრიბეთ, 12 ბანკთან დავდეთ შეთანხმება, რომ მათაც ეგრძნოთ თავი უფრო ვალდებულად ამ სქემაში მონაწილეობის თვალსაზრისით. ზოგიერთმა ბანკმა დაიწყო კიდეც ელექტრონული პლატფორმის შემუშავება ჩვენი დახმარებით, მაგრამ ჯერჯერობით ჩვენი ძალისხმევა წლის ბოლომდე ალბათ შედეგს ვერ მოიტანს, რადგან პრაქტიკულად, დროს საჭიროებს", - განაცხადა ნათია თურნავამ.


ამასთან, ეკონომიკის მინისტრმა იმედი გამოთქვა, რომ მომავალ წელს შესაძლებელი იქნება ამ უარყოფითი ტენდენციის გარდატეხა, თუ არადა, შესაძლოა სქემა სახეცვლილი და გაუმჯობესებული ფორმით შემუშავდეს.


"ვიცი, რომ თქვენ ამ სქემის დიდი გულშემატკივარი ხართ, პირადად მონაწილეობდით მის შემუშავებაში, მაგრამ თქვენი პირადი მონაწილეობის ფაქტიც კი არ აღმოჩნდა საკმარისი, რომ ბიზნესში ინტერესი გამოგვეწვია. მეტი მუშაობა გვმართებს და გპირდებით, ჩვენ ამ მიმართულებით მუშაობას გავაგრძელებთ", - განაცხადა ნათია თურნავამ.