მიმდინარე წლის 29 ნოემბრიდან 2 დეკემბრამდე ყვარელში (იუსტიციის სასწავლო ცენტრი) სტუდენტებისთვის ინოვაციური სტარტაპების ბანაკი გაიმართება. ბანაკის ორგანიზატორია ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტო. ოთხდღიანი ,,ბუთქემფი“ მსოფლიო ბანკის ,,ეროვნული ინოვაციური ეკოსისტემის“ პროექტის ფარგლებში ხორციელდება.

ბანაკის მიზანია ხელი შეუწყოს ქართველ ახალგაზრდებში STEM-ის (მეცნიერება, ტექნოლოგია, ინჟინერია, ხელოვნება-დიზაინი, მათემატიკა) შესახებ ცნობადობის ამაღლებას, რათა მათ უკეთ შეძლონ კარიერის დაგეგმვა და აქტივობები მიმართონ STEM-თან დაკავშირებულ ინოვაციურ პროდუქტებზე სამუშაოდ.

სააგენტოს პრესსამსახურის ინფორმაციით, ოთხდღიანი ბუთქემფის ფარგლებში სტუდენტებს საშუალება ექნებათ, შეიძინონ ცოდნა ინფორმაციული ტექნოლოგიების, STEM-თან დაკავშირებული თანამედროვე გამოწვევებისა და კორპორაციული თუ სამეწარმეო უნარ-ჩვევების შესახებ.

ლექციები ძირითადად დაეთმობა ხელოვნური ინტელექტის, რობოტიქსის, ინტერნეტის, ფინტექის საკითხებს. ადგილობრივი და უცხოელი გამოცდილი მენტორების დახმარებით სტუდენტები გუნდურად იმუშავებენ ინოვაციური ტექნოლოგიური იდეების შექმნაზე.

პროექტს ახორციელებს ილიას სახელმწიფო უნივერსიტეტი პარტნიორ ორგანიზაციებთან ერთად, ესენია: ოლდრიჯის მეწარმეობის ინსტიტუტი, ჯეოლაბი, ინოვაციური განათლების ფონდი და ედისონი. ბანაკის დასრულების შემდეგ ილიას სახელმწიფო უნივერსიტეტის პრე-აქსელერატორი ზუმაუთი და ფაბლაბ ილიაუნი აქტიურად იმუშავებენ სტუდენტებთან იდეების ხელშესახებ პროდუქტად გარდასაქმნელად.

ბანაკში საქართველოს ყველა რეგიონის 30 სტუდენტი მიიღებს მონაწილეობას. ისინი შეირჩევიან ბიზნესის, საინფორმაციო ტექნოლოგიებისა და კომპიუტერული ინჟინერიის პროგრამებიდან.

ბანაკში მონაწილეობა უფასოა, სრულად უზრუნველყოფილი იქნება ტრანსპორტირება თბილისიდან, კვება, განთავსება, ბანაკის პროგრამული ნაწილი.
მონაწილეები შეირჩევიან მათი გამოცდილებისა და მოტივაციის საფუძველზე.