მომავალი წლის ბიუჯეტი ეფექტურობაზე ორიენტირებულია, რაც სახელმწიფო უწყებების მიერ
აღებული ვალდებულებების დადგენილ ვადაში შესრულებას გულისხმობს -განაცხადა ფინანსთა მიისტრმა ივანე მაჭავარიანმა 2020 წლის ბიუჯეტის პრიორიტეტებზე საუბრისას.

როგორც მინისტრმა აღნიშნა, ბოლო წლებში, მიმდინარე ხარჯების შემცირების ტენდენცია სახეზეა.

მისი თქმითვე, 2016 წელს მიმდინარე ხარჯი მშპ-ის 25.9% იყო, ხოლო 2020 წლის ბიუჯეტში ეს მაჩვენებელი 23.2 პროცენტია იმ ფონზე, როდესაც მომავალ წელს გაზრდილია სოციალური და განათლების ხარჯები.

„მნიშვნელოვანია, რომ მომავალი წლის ბიუჯეტი ეფექტურობაზე ორიენტირებული ბიუჯეტია, რაც გულისხმობს, იმას, რომ სახელმწიფო უწყებებმა აღებული ვალდებულებები ეფექტიანად და დადგენილ ვადაში უნდა შეასრულონ. ბიუროკრატიული ხარჯების ეკონომია არ გახლავთ მთავარი მიზანი.

ჩვენ ვთვლით, რომ წმინდა მონეტარულ გამოხატულებაში მიღწეული ეკონომიის მასშტაბები საკმარისია და შემდგომი შემცირება მნიშვნელოვანი რისკის შემცველია. ამ პოზიციას საერთაშორისო სავალუტო ფონდი აქტიურად უჭერს მხარს“ - აღნიშნა ფინანსთა მინისტრმა ივანე მაჭავარიანმა.