ფინანსთა მინისტრის, ივანე მაჭავარიანის განცხადებით, მომავალი წლის მთავარ ფინანსურ დოკუმენტში პრიორიტეტად რჩება კაპიტალური ხარჯები და ინფრასტრუქტურის განვითარება, რომელიც ეკონომიკური ზრდისთვის უმნიშვნელოვანესია.

ეს განცხადება მინისტრმა 2020 წლის ბიუჯეტის პროექტის წარდგენისას გააკეთა.
ფინანსთა მინისტრმა, ასევე, ყურადღება გაამახვილა იმ ძირითად პრინციპებზე, რომელიც 2017-2020 წლებში საფუძვლად დაედო ქვეყნის ფისკალურ პოლიტიკასა და ბიუჯეტის შედგენის პროცესს.

„ჩვენმა ფისკალურმა პოლიტიკამ მნიშვნელოვნად გააძლიერა ქვეყნის მაკროეკონომიკური სტაბილურობა, გაზარდა ფისკალური სექტორის, როგორც ეკონომიკური ზრდის წამახალისებლის როლი. 2017-2020 წლებში, ჩვენი ფისკალური პოლიტიკა და ბიუჯეტის დაგეგმვა, ეყრდნობოდა სამ ძირითად პრინციპს, ესენია: ფისკალური დეფიციტის შემცირება, მიმდინარე ხარჯების კონტროლი და კაპიტალური ხარჯების ზრდა. ყველა ეს პრინციპი საფუძვლად დაედო საერთაშორისო სავალუტო ფონდის პროგრამას, რომლის ყველა მიმართულება მთავრობამ წარმატებით შეასრულა“, - განაცხადა ფინანსთა მინისტრმა ივანე მაჭავარიანმა.