ბათუმის აეროპორტში აჭარის რეგიონში შემოსული მემილიონე ტურისტი დააჯილდოვეს.

ვარშავა-ბათუმის რეისით დღეს 200 პოლონელი ტურისტი ჩამოვიდა, რომელთაგან ერთ-ერთს სპეციალური სერტიფიკატი ტურიზმის დეპარტამენტის ხელძღვანელმა პირადად გადასცა.

მემილიონე ტურისტი პოლონელი მეჩესლავ იეჟევსკი აღმოჩნდა, რომელიც ბათუმს მეუღლესთან ერთად ესტუმრა. მას საჩუქრად გადაეცა მომავალ წელს ერთკვირიანი დასვენების პაკეტი სასტუმრო „შერატონში“. ამასთან, წყვილს ბათუმის ტურისტულმა სააგენტომ უფასო ტურისტული ტურები და აქტივობები შესთავაზა.

როგორც იღბლიანმა ტურისტმა ჟურნალისტებთან საუბრისას განაცხადა, საქართველოს შესახებ გაზეთებიდან გაიგო და ბათუმში გადაწყვიტა დასვენება.

აჭარის ტურიზმის დეპარტამენტის ინფორმაციით, წელს პროცენტული ზრდის მაჩვენებლით განსაკუთარებით პოლონელი ტურისტები გამოირჩეოდნენ. მათი რიცხვი შარშანდელთან შედარებით 14%-ითაა გაზრდილი.