ბიზნესმენ ზურაბ ჯანელიძის განცხადებით, დღეს ბიზნესსექტორი ზეწოლისგან თავისუფალია და გამოთქმა „ბიზნესის ტერორი“ , გადაჭარბებულია.

როგორც ჯანელიძემ სააგენტო „ნიუსპრესთან“ საუბარში განაცხადა, ის სოფლის მეურნეობის მიმართულებით ბიზნესს 2006 წლიდან აწარმოებს და სახელმწიფოსთან პრობლემები არ ჰქონია.

„ჩვენ სოფლის მეურნეობის პირველად წარმოებაში ვსაქმიანობთ, გვაქვს გადამამუშავებელი საწარმო.
მართალი გითხრათ, ჩვენ არასოდეს გვიგრძვნია არავითარი ტერორი, პირიქით, ბოლო წლებია რაც სახელმწიფოსგან აგროპროექტებში დახმარებები ვიგრძენით, იგივე შეიძლება ვთქვათ პროექტ „აწარმოე საქართველოს“ მიმართაც.

ჩვენი კომპანიის დაფუძნების წლიდან პრობლემები სახელმწიფოსთან არ გვქონია. თუმცა ადრე არ იყო სათანადო ყურადღება სოფლის მეურნეობის მიმართულებით და ვფიქრობ, დღესაც აკლია დარგს ყურადღება. თუმცა დღეს ტერორი, როგორც ასეთი არსად დამინახავს და პირიქით, როცა ყოფილა გაურკვევლობა, მქონია შეხება შესაბამის სამინისტროებთან, უწყებების პირველ პირებთან და სათანადო დახმარებაც მიმიღია“ - განაცხადა ბიზნესმენმა.