„2011 წლის შემდეგ პირველად, Fitch-მა საქართველოს სუვერენული რეიტინგი გააუმჯობესა და ახალ ისტორიულ ნიშნულზე გადაიყვანა. დამოუკიდებელი საქართველოს ისტორიაში პირველად, სარეიტინგო კომპანიამ საქართველოს BB სტატუსი მიანიჭა, პროგნოზით - სტაბილური, - ამის შესახებ სოციალურ ქსელში კასპის მაჟორიტარი, ირაკლი მეზურნიშვილი წერს. მეზურნიშვილი Fitch-ის ახალ რეიტინგს ეხმაურება.

„აღნიშნული ცვლილება, საქართველოსადმი გამოცხადებული ნდობის და მის მიერ განხორციელებული რეფორმების აღიარებაა. 2018 წელს საქართველომ დაამტკიცა, რომ მას რეგიონული რისკებისადმი გამკლავების უნარი გააჩნდა, აქტიურად იმუშავა მცირე და საშუალო ბიზნესის მხარდასაჭერად, გადადგა მნიშვნელოვანი ნაბიჯები კაპიტალის ბაზრის ჩამოსაყალიბებლად, ხელი შეუწყო უმუშევრობის შემცირებას, კიდევ ერთხელ დამტკიცდა საქართველოში ბიზნესის კეთების სიმარტივე და ეკონომიკური თავისუფლება, გაძლიერდა სახელმწიფო ინსტიტუტებისადმი ნდობა და მრავალი სხვა. სწორედ ასეთმა მოვლენებმა უზრუნველყვეს ფიტჩის რეიტინგში საქართველოს წინსვლა და განაპირობებენ მის მომდევნო გაუმჯობესებასაც.

ყველაფერთან ერთად, საქართველო ერთად-ერთი ქვეყანაა რეგიონში რომელსაც ფიტჩმა რეიტინგი გაუუმჯობესა და ამასთან ერთად ცალკეული პარამეტრების მიხედვით საქართველო შეიძლება ითქვას წინმსწრებად, უკვე აკმაყოფილებს რეიტინგში მომდევნო წინსვლისთვის საჭირო მოთხოვნებს. საქართველო განვითარების სწორ გზას ადგას“ - აღნიშნავს ირაკლი მეზურნიშვილი.